Li napa fami sa mesie

« Li napa fami sa mesie,

Dan klas limem toultan dernie. 

Li reste dan shelter,

Li enn gran kretin. »

Li pa inn swazir so sitiasion,

Dan so latet enan bokou konfision.

So plezir se badinin riye,

So pli gran pastan se zwe.

Parfwa dan klas, li nek mazinin,

Lerla mis kriye, fer li onte.

Li pas pou enn inbesil parmi bann malin,

Tipti pe atann kan li pou gran pou li libere.

Parfwa li asize li nek reve,

Me seki li pli kontan se zwe boul amize.

Defwa kamarad sikann li, li vinn agresif,

Li defann li, e zot dir li bien negatif.

So manman ek so papa inn ale,

Granmer inn okip li, apre in large.

Zour bannla, ti pran li, li ti gele,

Pa ti mem konin kot li pe ale.

Dan loto li ti krwar li pe al dan prizon,

Ti sagrin pou kit tou sou bann kamarad.

Sa zanfan-la inn konn boukou tourbiyon,

Devan so lizie soular, prostitie inn fer parad.

Li’nn deza al dormi vant vid,

Kan koze, zot dir li stipid.

Ti gagn bate pou enn narnien ditou,

Tou so ti pansion ti pe al dan trou.

Li fer tou pou atir latansion,

Me parfwa devan so aksion, se linkonpreansion.

Bann prezize ek letiket pe touf li,

Me li, yamize ek apresie so lavi.

So ti latet ranpli ek zoli zoli rev,

Li pa demann boukou, zis pou les li fer so prev.

Kouraz tipti enn zour to zetwal pou briye,

Devan difikilte pa bes lebra, avanse.

Pa-za-pa, li pe fer so simin,

Pou al ver so destin.

So rev se gagn enn fami,

Mem si zordi li napa fami.

Leboner

Leboner,

Lib kouman ler.

Mo santi mwan anpe,

E telman telman leze.

Li pa lor montagn, anba ros

Dan fon losean ou dan pos.

Partou lor later mo inn rode,

Me mo pa inn trouve.

Mo ti bien sagrin,

Me kontign krwar dan destin.

Mo inn ouver mo leker,

La mo inn trouv leboner.

Li prezan kan nou donn e resevwar lamour,

Kan nou konn viv dan larmoni toulezour.

Mo santi kouman enn pwason enn zwazo,

Lib epanwi ek kool kouman delo.

Limem pli gran reisit,                  

Pran letan pa al vit.

Lib koman ler,

Mo pe viv leboner.

Renion leramiske

Renion leramiske,

Deroul dan sekre.

Zot zwenn dan marenwar,

Kan tou dimounn dormi aswar.

Zot met latet ansam,

Pou planifie zot bann magouy.

Pa gagn letan met lagam,

Zot pa bann grenouy.

Dan so zoli linz misie-la smart,

Goste gete ou pou etonin part.

Me pa koste, laparans tronper,

Parski avek zis enn loder piyanter.

Zot plan se abiz lor lezot,

Tou lakaniot al dan zot pos.

Mark zot teritwar par zot move loder,

Dan ou prop lakaz ou vinn mwins ki lokater.

Sak fwa zot zwenn plan se destriksion,

Pou zot regnien zot kre divizion.

Parfwa avegle pa zot gran lapeti zot kole,

Galoup isi galoup parla, apresa tase.

Sirtou pa ekout zot diskour,

Parol pa match ek askion.

Zot bit se kontrol mem ou lakour,

Avan zot anrasinin pran prekosion.

Touleswar zot zwenn,

Plan se sem laenn.

Zot koze riye,

Dan renion leramiske.

They are dead,they don't know it

They are dead,

They don’t know it.

Since long they have been chasing a phantom,

That they will never catch.

Their entrails are being eaten by venomous worms,

Their bodies are full of dirty things.

In the ignorance they dig their own tombs,

Their blindness makes them walk towards them.

Their sleep is worse than death,

Better to know sudden death than to follow them.

Even the demons don’t want to have them in their evildom,

As their unpleasant smell will lead lose souls away.

Imprison in the walls of stupidity,

They know no more what is meant by dignity.

Dogs urinate with them taking them for barren trees,

They have everything but are nothing.

They are gone,

And their souvenirs along with them.

No one remark their absence,

No sorrow, no mourning.

The ghost is still roaming around,

Other scoundrels running after it.

They are dead,

They don’t know it.

Zot zwe lor laparans

Zot zwe lor laparans,

Abiz lor to liniorans.

Vini avek zot zoli parol,

Pou ki to rant dan zot rol.

Dir twa cheri pou bous lizie,

Seki interes zot se to lamone.

Zot roul brit lor larout,

Zot viv a la va te fer fout.

Koman to get zot to frisone,

Si to for to pou reziste.

Detourn to regar,

Pa les twa tonm dan marenwar.

Ek zot ti linz sexi,

Fer twa trouv zekli.

Fini twa apre ziz twa,

Dir to pabon, maltret twa.

Napa zeneralize, fer atansion,

Pran to letan enan ki bon.

Zot get twa kouman enn prodwi,

Zot vire zot al kan fini servi.

Tronpe par laparans to tonbe,

Koman enn pwa dan file.

Zot parey bann votour,

Zamin zot inn konn vre lamour.

Zot pran zot pou bann nob,

Me ler gete zot bien snob.

Zot lor fos larout,

dan zot latet zis dout.

Par enn regar malisie,

To vann to nanm.

Devan tantasion reziste,

Lor simin laverite, li zis enn makadanm.

Napa abiz lor zot febles,

Olie perdision swazir lasazes.

Liniorans pa egal inosans,

Get bien, zot zwe lor laparans.

Enn sinp regar

Enn sinp regar,

Li redonn lespwar.

San gran zefor,

Li enn rekonfor.

De regar krwaze,

Enn lalimier sintiye.

Resof leker,

Amenn le boner.

Dekouver enn dimounn,

A traver lafenet leker.

Apre sa premien pas,

San okenn lanbara.

Enn sinp regar,

Ki li lezour ki li aswar.

Li amenn lalimier,

Kan li vinn depi leker.

Li pous twa ver lezot,

To dekouver zot.

Enn rankont inoubliab,

San fer palab.

Lizie dan lizie,

San oken koze.

Li amen lespwar,

Enn sinp regar.

Koze grandimounn

Koze gran dimounn, nouri nou ek to sazes,
To sof lanbian ek twa penan okenn zes.
Pou nou to koman enn lasours,
Nou gran par to prezans, to enn gran resours.


To permet nou vwayaz dan letan,
Enn lazwa pou dekouver lavi Rodrig danstan lontan.
Pli to koze pli nou anvi ekoute,
Sak zour avek twa nou dekouver nouvote.


Anba to brans nou gagn lonbraz,
To enn far ki gid nou dan bon direksion.
To protez nou kont tanpet ek move viraz,
To enn lalimier ki donn nou lekleraz.

To’nn depas swasant-an e to pakor pou demisione,
To dir to pou kontinien tan ki to kapav marse.
Kan to la nou rasire nou pa gagn per,
Par to temwaniaz nou resevwar bokou valer.

Twan grandimounn, to enn trezor,
Devan nou lizie to vo plis ki lor.
Par nou rekonesans nou rann twa omaz,
Nou bien ere kan nou trouv to zoli vizaz.

Zanfan fer enn laronn letour twa,
Zot inn vini pou tan to lavwa.
Nou tou an pandan ek to lalev,
Lespri Sin travay dan twa koman lasev.

Lavi pou twa pa ti fasil,
Parfwa linn paret bien frazil.
Zamin to pa inn bes lebra,
To inn les twa gide par to lafwa.

Dir nou ki sekre to reisit,
To fer nou konpran ki letan pas vit.
Rest atase ek Bondie pa dekouraze,
Travay onet ek touzour persevere.

Kan to la nou santi nou bien,
Avek kouraz nou afron landemin.
Nou pa mem panse ki to pou kaypounn,
Vini omilie nou koze gran dimounn.