Bananin tou dimounn

Ki zot epanwi kouman sa bwa Benzwin-la

Yer swar tou dimounn ti atann minwi ek inpasians,

Kan minwi ti paret lor revey inn pet petar pou pous malsans.

Bann zanfan zenn ek grandimounn tou ti dan lazwa,

Boner ti partou ek sakenn inn donn so paran ek zami enn ti ba.

Enn nou lanin komanse,

Soley 2013 zordi pe briye.

Enn nouvo larout ouver devan nou,

E nou lavi kontign roule kouman enn larou.

Dan lakour roti ek vinday inn fini pare,

Lor tou lateb bon konpot dan bol  pe mizote.

Mo ninnin ouver fermin pou respir sa bon parfin,

Dan fami tou dimounn zwenn letour enn bon repa pou dinin ek dezinnin.

Enn lanin inn pase, nou dir mesi Lesenier,

E nou espere ki sennla-la li pou meyer.

Sa lanin la pou amenn sanzman dan nou lavi,

Ek avek lazwa nou swet li labienvini.

Enan ki dan sa lanin la pou pran bann gran desizion,

Lezot pou zwenn lamour ek gagn enn bon ti kontan.

Enan lotbann ki pou avanse ek pas ver enn lot letap,

Ek anfin lezot dan zot lavi pou met serye ek vinn pli stab.

Bann nouvo pe prezant devan nou,

Anou pa per ek donn li plis gou.

Avek kouraz nou avans ver nou lavenir,

Ek travay pou nou pep konn enn bon fitir.

Enn lanin inn ale,

Enn lor inn arive.

Nou swete ki li pou bon pou nou tou,

Bananin tou dimounn.