Lavi! Enn konba ant lebien ek lemal.

Lavi se enn konba ant lemal ek lebien,

Enn lalit ki koumans dan nou leker ek fer so semin.

Par nou latitid nou deside ki pou viktorye,

Nou parol ek nou aksion se refle seki nou panse.

Partou kote tann koz violans ek dinite ki bafoue,

La kot pe fer dibien okenn tapaz pa tande.

Dan tou pei dan lemond enan soufrans,

Frer touy frer ek swazir semin mefians.

Zonm saz, li apresie reflesi ek medite,

Pa so konportman li enn artizan lape.

Me deor laverite pa trouv so plas,

Me li montre seki nou ete kouman dan laglas.

Tou seki vini pou denonse zot masakre,

Akoz sa bokou vann zot lamour prop ek pas an mod diskre.

Kan ou koz sanzman dir ou enn revolisioner,

Fer ou labous pas an mod yesman, dir ou enn akter.

Lavi se enn konba ant lemal ek lebien,

O fon noumenm, de konbatan pe afronte.

Se touzour zonm ki lib pou swazir so semin,

Nou lib pou swazir ant perfeksion ek fot.

Pou zistifie sertin dir personn pa parfe,

Parski zot konin zot lavi ranpli ek malpropte.

Perfeksion se enn semin ki aksesib pou nou tou,

Nou enan pou swiv nou leker menm lezot dir nou fou.

Deryer tou konfizion enan enn montagn dout,

Se laper ki anpes nou fer nou larout.

Kan nou tonbe ek pa leve samenm ki fatal,

Lavi se enn konba ant lebien ek lemal.