Mo Rev

Mo rev enn lemond nouvo,

Kot sak dimounn pou enn ero.

Mo rev seki saki min ere,

Ki sak zanfan santi li valorize.

Bann fami pou bann lespas lepanwisman,

Pou sa arive sakenn pou amenn so kontribision.

Priyorite pou larmoni ek boner,

Personn pou nepli fer maler so frer ou s oser.

Mo rev enn liniver nouvo,

Kot personn pa pou konsidere kouman enn zero.

Lor vizaz sak zonm, fanm, zenn ek zanfan pou enan sourir,

Nou tou nou pou les nou gide par nou konsians lor semin lalimier.

Lager ek laviolans pou nepli existe,

Fizi ek lepe pou bann zistwar pase.

Laenn, lorgey ek zalouzi pou tire dan diksioner,

Se lape, lamour ek lazwa ki pou ranpli tou leker.

Mo rev enn latmosfer nouvo,

Kot pou nepli port zizman dapre relizion ou kouler lapo.

Bann dimounn pou konsidere kouman sitwayin mem limanite,

Frontier ki kree akoz pouvwar ek larzan pou tonbe.

Bann fanm pou respekte kouman manman, ser ek partner,

Non kouman obze pou satisfer bann dezir inpir ek efemer.

Dan sak pei partou bann Gandhi, Mer Teresa ek Nelson Mandela,

Bann freedom fighters pou fer lamour vinn sel lalwa.

Mo rev se to rev, se nou rev, pou realiz li anou fer tou,

Anou swiv semin lalimier kouman disel donn gou.

Sak zour mo swazir lavi ek donn mo lavi pou mo rev,

Mo rev se ousi lite pou ki sak dimounn realiz so rev.

+Jean Rex Casimir