DEMIN

Demin

Li pa dan mo lamin.

Mo ignor seki pou ariv mwan,

Mo enan zis linstan prezan.

Ki mo pou ete,

Mo pa kapav prononse.

Posib mo pou enn serviter,

Ki pou lite pou enn mond meyer.

Kapav ousi ki mo pou enn pelerin,

Ki pou pas so letan lor semin.

Viv o zour lezour,

Inpe delo ek plin lamour.

Sa dir mwan ousi vwayaze,

Pass parsi parla explore.

Mo kontan bann nouvo lamitie ek dekouvert,

Se enn lazwa viv bann nouvo nouvo levennman.

Yer li kouman delo ki ale anba pon,

Seki reste se zis souvenir ek lemosion.

Lefitir li kouman lorizon ki bien elwanie,

Seki la se later ki anba nou lipie.

Li pa serti narnien ki mo strese,

Galoup isi laba fer sesi fer sela kan letan pe pase.

Okontrer li inportan kan nou rest dan letan,

Profit enn maximum moman prezan.

Seki mo ete zordi dir seki mo pou ete demin,

Avek limilite mo zis kapav espere ek dir ki mo pa konnin.

Difil mo lavi dan lamin mo kreater,

Li la ek touzour dan mo leker li pou met lalimier.

Pou linstan sak ti segonn anou valorize,

Reflesi, rod seki meyer, profite san abize.

Mo inn vini mo pou ale kontign mo semin,

Mo persevere avek konfians pa kas latet ek demin.

+Jean Rex Casimir

Zedi 9 zanvie 2014