Lavi li enn semin

Lavi li enn semin,

Ki amenn bien bien lwin.

Seki fondamantal se ki nou avanse,

Ki li lor plato, ladesant ou lamonte.

Kan nou pa avanse,

Nou reste bloke ek mem rekile.

Nou devwar se ki nou al ver lamelyorasion,

Al an avan dousman me sirman.

Pa serti narnien galoupe pou ariv premien,

Nou sel adverser se noumem.

Li kapital ki nou panse seki feb, trap so lamin,

Selwi ki nou ede, demin pou kapav tir nou dan problem.

Lavi li enn semin,

Sak letap enan so koumansman ek so lafin.

Nou penan pou prese,

Letan inn fer pou nou medite ek apresie.

Li esantiel nou reste dan letan,

Fer seki meyer a sak moman.

Nou zamin sir seki pe atann nou,

Seki nou enan se liprezan ki devan nou.

Detanzantan enn konpagnon pou ale,

Les nou avek bon souvenir lepase.

Lerla nou devwar se fer konfians ek aksepte,

Sakenn enan so zistwar ek so liberte.

Sak dimounn se enn zistwar sakre,

Sak rankont lor nou larout li bien presie.

Kouman enn sel fami, nou pou zwenn a lafin,

Lavi li enn semin.

+Jean Rex Casimir