Fam amenn to konba

Fam amenn to konba,

Dan to lavi se twa ki fer lalwa.

Avek perseverans ek kouraz to pou reisi,

Debout e vinn met de to prop lavi.

To enan dan twa gran kouraz,

Avek disiplinn penan okenn derapaz.

Fam to enan vizion e to anvi avanse,

Marye pike zwenn ansam, zot pou arive.

Kisennla apart twa kapav donn lavi?

E to fer li san enan okenn garanti.

To travay dir pou to zanfan progrese,

E to fer li san atann okenn lintere.

Dan sosiete parfwa to valer pa rekonet,

Me twa to pa rod fer mari, to onet.

Enan me ki pran twa pou inferyer,

Me twa to konin ki vedir loner.

Fam to enan enn gran rol pou zwe,

Sak zonm ki reisi to prezan dan so kote.

Li malere ki enan maltret ek denigre twa,

Me twa fanm to sinserite samem ki fer to bote.

To konin ki vedir fer sakrifis pou to fami avanse,

Fam kan rann twa omaz, to bien merite.

Zamin to per pou konbat pou ki enan lalimier,

Penan narnien pli pir ki seki enan dan to leker.

Enan ler dan sosiete fam viv linzistis,

Sa pa dekouraz li konbat pou la zistis.

Fam to ler zordi inn arive,

Napa per kan to zetwal pe briye.

Zordi penan nivo kot to pa kapav arive,

Touzour kontign fam e pran responsabilite.

Napa les twa abat par traka,

Fam amenn to konba.