Siklonn Ethel li inn vini li inn ale

Siklonn Ethel li inn vini li inn ale,

Seki ki li inn fer pa pou fasil pou bliye.

Nou pa ti pe atan li pou vini,

Nou ti anvi zis inpe lapli.

Enn zenn finn perdi so lavi,

E nou sinpatiz ek so fami.

Gro gro brans finn kase ek pie derasinin,

Pie banann kas an de me lavi li kontinien.

Ethel, Ethel, nom zoli me li enn gran devaster,

Kas tou ti mange k zet tou bann kolon parter.

Pandan trwa zou Rodrig inn dan marenwar,

Bann ti zanfan pa konin koman pou dormi aswar.

Gro gro divan soufle dan bann fey,

Kan li ale pep Rodrige dan dey.

Me enan ki ti pe kas latet zis ek eleksion,

Samem dan sa moman ti zot sel preokipasion.

Enn lavi finn anleve ki sennla pou kapav rann kont,

Fami dan dey, seki pa resanti sagrin zot san dront.

Ethel les nou dan larm, leker lourd pa kapav tini,

Bokou dimounn dan traka, sirtou bann ti fami.

Tan ki nou viv nou pou temwanie,

Mem si Ethel zordi zis le pase.

Dan nou memwar li pou rest grave,

Siklonn Ethel li inn vini li inn ale.