Konba pou la liberte li kontinie,
Akoz lorgey sertin li menase.
Zot les zot domine par zot lorgey,
Zot mazinn larzan mem dan zot somey.
Avek zoli parol zot kouyonn nou lespri,
Mantalite individialism fer bann relasion rasi.
Sikl lesklavaz li revini a sak fwa dan listwar,
Enan sertin krwar zot siperier e ki gourman pouvwar.
Seki les zot gide par lamour pou libere,
Fer dibien pou lezot bizin priyorite.
Melodi la liberte li pe retenti,
Seki atentif pou kapav profit lavi.
Bann gran temwin sant kantik liberasion,
Zot inn rann temwaniaz par tou zot bon aksion.
Lasenn lazalouzi ek laenn nepli amar nou leker,
Tou dimounn egal ek merit mem loportinite lor later.
Lemond finans pe kontign fwet bann fami mizer,
Fer profi a ninport ki pri pou zot se lobzektif priyoriter.
Nou tou kone ki nou prop boner par seki pou lezot,
Me enan refiz partaze e akimil fot enn lor lot.
Kan eski vremem tou form lesklavaz pou aboli?
Ennta zonm ek fanm ansene dan bokou fleo zordi.
Zefor pou progrese ek bonn volonte pou enn meyer demin,
Touletan nou bizin gard flanbo lespwar ek res met nou destin.
Seki pli vilnerab bizin gagn enn latansion partikilie,
Ansanm lamin dan lamin nou pou kapav fer lamizer rekile.
Zis la verite ki kapav rann nou tou lib,
Kan nou inn libere narnien pa pou inposib.
Mantalite ki nou enan bizin sanze,
Bann move labitid anou abandone.
Nou enan devwar pou fer memwar,
Rapel nou zanzet ki'nn viv lamizer nwar.
Bann valer familial la pou permet nou grandi,
Lamour, lafwa ek lesperans donn sans nou lavi.
Sak dimounn enan so rol pou zwe selon so kapasite,
Penan personn ki merite ki nou met li de kote.
Vre progre li pas par devlopman sak individi,
Kan bann dimounn grandi lekonomi grandi.
Vre nom devlopman zordi se lape,
Konba pou la liberte li kontinie.
No comments:
Post a Comment