Aret Zalou

Aret zalou
Aret zalou, kifer to fer foste koumsa,
Dan to lespri to pa aksepte okenn lalwa.
Kan to trouv to prosin arive, to ronfle,
To pa trouv sa pou benefisie bienet sosiete.

Kan fer fet, to vini to amize,
Apre kouman enn tret to al kritike.
To asiz letour mem latab ki mwan to manze,
Me dan to leker dife laenn pe brile.


Ler enn dimounn resi progrese,
To mazinin kouman pou tir so manze.
Nou tou, nou enn sel fami,
Me twa to refiz viv kouman enn vre zami.

Touletan to pe met baton dan larou,
To fer tou pou trenn to prosin dan labou.
Tou seki dimounn gagnien to groker,
To nek zis touletan pe ris leker.

To rod lipou poul kot penan,
To leker ranpli ek move santiman.
Ouver to lizie viv lamour, arete ek to bann sal kou,
Seki kontan twa anvi to sanze e dir twa aret zalou.

+ Jean Rex Casimir
23 Oktob 2011