Mo lamour pou mo pei
Kan mo debout lor montagn persi,
Mo resanti enn gran boner kan mo trouv bote mo pei.
Mo mazinn tou sa bann zoli laplaz,
Bann gran lafore, Cavern patate, saint François ek bann cokiyaz.
Kan mo mont lor montagn limon pou observ mo peyi so bote,
Mo konpran ki to inn fer pou avanse e zamin rekile.
Mo pep li bien zanti, sourian e touzour akeyan,
Kourtwazi, zantiyes ek partaz fri zot bon santiman.
Sakenn konn so kamarad e solidarite pou nou li natirel,
Nou bann dimounn, nou later ek lamer, narnien pa artifisiel.
Bann peizaz extra zoli partou kot ale,
Avek so trankilite, gran matin se dan lazwa nou reveye.
Mo pei twa ki enan premien plas dan mo leker,
E mo vreman soufer kan mo pep ape soufer, viktim lamizer.
Mo’nn grandi dan enn fami e zamin mo inn mank narnien,
Nou lavenir dan nou lamin, nou mem ki bizin desid de nou destin.
Pei ki finn fer mwan vinn enn panser,
Mo dir twa mersi avek enn leker sinser.
Mo rev pou twa seki to konn e grandi dan la liberte,
E ki to realite ek lefe ki to inik li respekte.
Ansam avek mo bann frer ek ser ki enan vision,
Nou pou travay dan linite pou ki to al touzour de lavan.
Pou seki tonn fer pou mwan san hezite pou twa mo pou donn mo lavi,
Plis ki avek parol me avek aksion ki nou bizin fer konpran ki to enn paradi.
To mem ki pli zoli e to merit boukou plis ki sa,
Mo swe se ki nou gagn bann vre vizioner ki pou resi amen twa laba.
Laba kot sak dimounn pou santi li a lez, sa li pou pous twa pli lao,
E kot nou tou kan nou al dormi nou pou konn enn bon repo.
+Jean Rex Casimir
No comments:
Post a Comment