Metie profeser

Metie profeser

Metie profeser samem ki pli serye,

Dan leker bann zanfan nou dekouver lalimier ki briye.

Dan pei nou mem enan pli gran responsabilite,

Noue nan pouvour pou fer nou lemond sanze.

Metie profeser samem metie ki pli nob,

Bann ki rantre zis pou gagn kas zot bien snob.

Enn profeser li parey enn semer,

Savoir ki transmet li grandi an boner.

Ki pli zoli ki trouv enn zanfan progrese,

Dousman, dousman kouman enn plant li devlope.

Nou enan kapasite pou fasonn bann personalite ek karakter,

Par nou bann bon legzamp pou nou zelev nou pli gran ki akter.

Mis, mesie, to bizin bien bien fier,

Fier ki to kapav ede pou kre enn mond meyer.

To pli gran zouti se lamour ek konpreansion,

To bon parol li bizin swiv par bon aksion.

Profeser to pa zis enn rol model,

To bann zelev trouv twa kouman enn top model.

Kan to bann zelev zot reisi dan la vi pou twa li enn fierte,

Li natirel ki to trouv bann nouvo metod pou ansegne.

Kan to fer to metie avek kreativite ek limazinasion,

Touletan to bann zelev pou mars lor simin perfeksion.

Dimounn kontan kan trouv twa fer to metie avek passion,

Dan lekol kouman dan kolez to merit gagn felicitasion.

Twa ki zordi inn aksepte pou vinn enn profeser,

To bizin kapav fer to travay ek tou to leker.

To enan enn gran rol pou zwe dan sosiete,

Ek to bizin pa atan pou gagn rekonpanse.

Kan to rant kot twa, parfwa to fatige,

Me li sir ki to lespri li anpe.

To fer to travay avek boukou limite,

To volonte, zefor ek proximite permet twa exsele.

Profeser, profeser pou boukou to enn gran mister,

Me twa to kone ki to rol li vo ser.

To ti kapav inn vinn enn gran dokter,

Pou twa pli gran boner aster se fer metie profeser.

+Jean Rex Casimir

11 Oktob 2011