Fos profet

Fos profet

Seter granmatin misie la fini leve.

Dan so latet li pe kalkile,

Koman pou fer pou tir maximum ek zot.

Lanin ale, lanin vini seki li fer, pou li pa enn fot.

Li dir bann zoli parol ki bann dimounn anvi tande.

Li fini konpran ki dimounn fasil tourn ledo ek la verite.

Li pa per pou zwe ek zot santiman,

Parski ki zot febles se sertin lemotion.

Li refiz kwar dan Bondie

e li anpes lezot viv ere.

Kan li koze li koz avek pasion,

Ou ekoute, ou riye ou gagn enn extra sansation.

Pou sertin to mem kapav fer mirak,

Me pou twa se zis manier met zot dan lak.

To krwar ki to’nn gagn don,

To mem dir ki parfoi to gagn vision.

To penan limit e to krwar ki kapav diriz lavi dimounn.

Zot pa gagn draw panse, to anpes zot viv zot liberte.

Kot to pase to sem dezord, to kouma dir enn vre typhoon.

Me dimounn so lespri eklere li pou kone ki dan koze, aksion ek panse penan plas pou la verite.

Bondie appel twa pou enn mision,

E twa to prefer galoup derier ilizion.

Ton vol fitir boukou zenerasion,

E zordi to pale repanti e demann pardon.

To bous lizie dimounn avek enn bann zoli zistwar,

Me twa to rev se touletan gard pouvwar.

To enan enn ta disip ki pou swiv twa ziskan lamor,

E sa fer twa krwar ki to enn zom for.

Fos profet to pa konin ki tou seki seki monte bizin tombe,

Akoz to bann mansonz e to lavi malonet satan pe atan twa lebra ouver.

E tou bann dimounn ki pe swiv twa e ki dir zot ere,

Zot bizin prepar zot pou al dan lanfer.

To pa merit ki fer twa konfians,

To abiz lor dimounn avek zot liniorans.

Me malere tou bann mars derier twa,

Parski zot refiz lalimier e zot pa aksepte vre lerwa.

To zour li konte e to pa pou sape,

Kouman to kapav dormi aswar?

Eski to konin ki ete lape?

Get kouman to lavi dan marenwar.

Fos profet to pa kone ki ve dir loner.

To mem zistifie soufrans, la penn ek laper.

Depi boukou bananin to pe amenn dimounn a la baget.

Alor ki pou twa toulezour se fet.

+Jean Rex Casimir

9 septam 2011

Ekir kot mo gran kamarad Cedric