Preske partou kot mo gete mo trouv division.
La verite, la paix lamour zordi nou pa tro koze,
Parski nou nepli kone ki zot reprezante.
Lotzour la monn pase, mo pa inn hezite pou donn mo disan,
E mo pa inn demann mwa ki lavi sa pou sove.
Pourtan enan enn bann ki dir ki nou tou nou diferan,
Mwa mo krwar ki enan plis kitsoz ki rasanble nou ki seki kapav divize.
Morisien, Rodrige, Agaleen, nou tou nou zanfan enn sel nasion,
Kouman li pou zoli kan nou tou nou pou kapav get mem direksion.
Li bien zoli kan bann zanfan nou pei zot trap zot lamin pou zwe,
Me par derier lespri satan dir ki saken bizin protez so kominote.
Nou tou nou respir mem ler e nou disan mem kouler,
Sakenn enan so lide me pa akoz sa ki nou bizin lager.
Inn ler pou ki tou bann barier tombe e nou fer linite,
Si nou tou nou travay dan larmoni tou dimoun pou ere.
Nou kone ki nou tou nou enn sel me an realite sakenn get sakenn,
Kan mo get kouman mo pei li divize mo leker li dan lapenn.
Mo rev seki nou tou nou lite ansam pou enn monde meyer,
Kot nou tou nou kapav viv kouman frer ek ser.
Avek sazes mo dekouver ki koz division se pa nou diferans,
Se plito nou bann move santiman ek lespri vanzans.
Kifer to refiz pardonn to frer kinn fer twa soufer?
Lane ale, lane vini, generasion apre generasion nou fer touletan bann mem erer.
Moris, Rodrig. Agalega anou zwenn ansam kouman kouler larkansiel,
Parski nou kone li bien zoli kan nou tou nou fer enn sel.
Sakenn so lide, sakenn so lidantite, saken so dezir,
Me kan nou met tousala ansam, se lerla ki nou kapav konstrir lavenir.
+Jean Rex Casimir
9 septam 2011
No comments:
Post a Comment