Mo fier mo enn scout

Mo rappel sa zour kot mo ti fer mo promess scout,

An enn segond mo trouv mo lavi sanz enn kout.

Sa ti enn gran lazoi pou mwa rant dan sa gran fami,

E sa zour la mo rappel ti enan enn gro lapli.

Scout inn sanz mo lavi pou fer mwa vinn meyer,

Zordi scout pe permet mwa trouv mo boner.

Si mo la se gras a mouvman scout,

A traver scout monn dekouver mo larout.

Kampe, exkirsion, zwe, scout bien serie,

Zeness vini to pou trouve to pou ere.

Mo enn scout e pou mwa li enn gran fierte,

Mo sir ki zame mo pa pou regrete.

Dan scout enan plas pou tou dimounn evolie,

Vini tomem to va trouve kouman ansam nou avanse.

Depi ki mo inn rant dan scout mo pa inn aret progrese,

E avek mo bann frer ek ser, nou pou touzour kontign lite.

Vizit bann gran dimounn, netway laplaz oubien vilaz,

Touletan ena kitsoz interesan pou fer avek kouraz.

Mo paran inn met mwa dan scout pou ki mo grandi,

Mo konsey bann paran ankouraz zot zanfan pou rezoin nou, sa pou ed zot dan zot lavi.

Zame mo pou blie sa zour kot diran enn la mess,

Mwan avek mo kamarad nou ti fer nou promess.

Enn gro lapli ti tonbe koumadir enn benediktion,

Sa zour la mo ti resanti enn gran satisfaktion.

Zordi gras a scout monn dekouver bann nouvo lorizon,

E mo grandi a traver tou sa bann bon aktion.

Dan scout mo santi mwan dan mo fami,

Gras a sa mouvman la mo’nn reisi donn enn sans mo lavi.

Viv kouman enn scout se enn la zwa,

Se enn gran privilez ki permet nou dekouver nou kapasite.

Nou apran ki sak dimounn linn fer pou sukse.

Nou aprann ki sa ve dir viv ansam mwan ek twa.

+Jean Rex Casimir

10 septam 2011