Donn to lavi enn sans

Poem

Dan ti kwin trankil to pe asize,

To santi enn pwa lor to leker.

To pe demann twa si vreman to ere,

Kifer to santi ki to pe soufer.

To poz twa ban kestion lor to lekzistans.

Eski lavi se zis manze, bwar amize.

To krwar ki penan personn ki to kapav fer konfians,

Arive defwa ki dan enn segond tou seki to’nn konstrir li tombe.

Ki mo été, kifer mo la e kot mo pe ale ?

Sa bann kestion la to kone ki zotmem la kle.

To kone ki to pa la par hazar e ki to bizin pas a laktion,

E sirman to bizin pran bann desizion.

Parfwa to gagn per, per ki to fer erer.

Souvan to santi ki to pa ekout to leker.

To lespri pa an pe e to latet anvi exploze.

Tou sa bann pression ki vinn de tou kote.

Eski lor sa later to enan la liberte ?

Touletan zot rod impoz zot bann desizion.

E si to lib, kifer to liberte pa respekte ?

Pou to prop lavi zamin to enan rezon.

Ena ki viv pou so fami, enan lezot ki donn zot lavi pou zot pei.

E twa ki ena talan ki pou twa enan pli gran pri?

Pou tou avans tou bizin konpran kifer twa bouze,

Donn to la vi enn sans pouki tosi to kapav dekouver realite.

To enan valer e to kone ki to merite,

Leve e pa ezite pou fonse.

Al pli loin, viz pli ot,

E dan melodi to lavi zwe bann zoli not.

+Jean Rex Casimir

12 Septam 2011