Mo pa pou res trankil

Devan linzistis eski mo kapav ferm mo lizie,

Kan bann hipokrit pa respekte nou dignite.

Zot rod aste nou konsians pou ki nou labous res ferme.

Zot konsider nou kouman esklav ki pa merit okenn respe.

Pou zot, zot mem ki fer lavenir,

Me an realite zot pe vol nou fitir.

Zor abiz lor bann seki zot dir ti malere,

Zot desann dan loto avek enn ta promes kinn expire.

Zot lazenda se sem partou divizion,

Pou lepep avanse zot pena okenn vre vizion.

Zoli parol dan labous pou bous nou lizie, me leker bien nwar,

Dan zot bann renion sekre stratezi pou anbet nou ki zot devlope, fodre ou tande pou ou krwar.

Akoz larzan ek larises zot inn tourn ledo avek Bondie,

Seki gouvern zot zordi se zot prop lintere.

Bann dimounn pov, zot pe donn fos lespwar,

Alor ki zot zoli kostim bouton dore ranpli larmwar.

E mwa ki pa kapav siport la zistis,

Kouman eski mo kapav les mwa vinn konplis.

Bondie twa kinn appel mwa pou sem laparol,

Donn mwa la sazes ek lafors pou zwe mo rol.

Mo pou anonse, mo pou denonse,

Tan ki sa bann lasenn lesklavaz modern pa tombe.

Maler pou mwa si mo pa temwagne e mo res trakil,

Si mo per pou denons sa bann dimounn ki san pitie pe pous mo pep ver lekzil.

Bondie fer ki mo pa tante ver pouvwar,

Me ki touzour mo la pou transmet savwar.

Si bizin pou mo donn mo lavi, mo pa per,

Parski mo sir ki mo pou bizin soufer.

Me devan linzistis ki impoze lor tipep frazil,

Mo promet ki mo pa pou res trankil.

+Jean Rex Casimir

8 septam 2011

mo dir bann dimoun ki anvi reazir devan enn sertin situasion reflesibien et pa fer li tousel.