Nwel se fet bann pov

Bondie vinn rezwenn nou dan nou limanite,

Li vini avek pli gran sinplisite.

Dan enn letab laba nou sover vinn donn sakenn so sans,

Li nek demann nou fer li 100 poursan konfians.

Enn zetwal aparet dan lesiel,

Bann saz swiv ek dekouver lesansiel.

Premien ki resevwar mesaz se bann ti gardien,

Bann ki marzinalize ek bann ki konsidere kouman voarien.

Nou sover inn ne, li pe vini o nom la verite,

Ek lor so azanda, priyorite se nou liberte.

Li vinn akonplir plan Bondie, nou  boner,

Ek to seki dir wi kapav vinn bann gran akter.

Bann zanfan met pare pou gagn kado,

Zour Nwel anba sapin zot tou vinn bann ero.

Sa zour la enn sourir aparet lor zot figir,

Ek dan zot lizie enan enn gran lalimier.

Nwel nou montre ki nou leker dan nou lamin,

Nou azir ek zenerozite pou nou bann frer dan petrin.

Dan enn gran lien solidarite nou fer lalimier briye dan sak fami,

Se lokazion pou nou valoriz sak dimounn ek anbelir lavi.

Nou pans osi bann ki trouv zot dan difilkilte,

Bann seki lor lili ou ki dan fami fek enan enn dese.

Pa bliye nou bann frer ek ser ki lopital ek dan prizon,

Nou swete ki demin zot konn enn bon sitiasion.

Se Nwel sak zour ki nou travay pou lazwa,

Osi sak minit ki nou permet lezot fer enn pa.

Nwel vinn konfirm lamour Bondie pou so zanfan,

Nwel se fet bann pov, fet tou bann inonsan.

Ler pankor arive

Ler pankor arive,

Kifer zot prese?

Pa akoz zot pa anvi pirifie zot de zot pese,

Ki zot anvi ki tou arete?

Enan ti dir lan mil,

Lezot 1923 ek lan demil.

Aster zordi dir 21 Desanm,

Kot nou tou pou mor ansanm.

Profet maler ki viv lavi an lanver,

21 Desanm me to pe fini to frer!

Pep ki ti predir sa li inn fini exterminin,

Akoz so prop lorgey ki ti anpes li krwar dan destin.

Maler partou kote, touye, masakre ek detrir,

Partou pa kapav viv ansanm viv an frer.

Dan Lerop ek Lamerik manze a gogo,

Ek dan Lafrik, lor lasiet penan menm enn zero.

Kifer dan lemond enan otan maler,

Se enn zonm ki deryer enn rivolver.

Lafaminn resofman klimatik pe fer dega,

Se akoz laper ek gourmandiz ki enan tousala.

Ler pou vini, ler pankor arive,

Plan Bondie personn pa kapav kase.

Ek nou zordi anou viv enn lot manier,

Anou abandonn move lavi ek viv leboner.

Kontan nou Papa ek nou prosin,

Samenn ki nou vre destin.

Ler zordi pou nou sanz nou mantalite,

Adopte bann bon latitid avan ler arive. 

Se zis enn kestion latitid

Se zis enn kestion latitid,

Plis ki bann sinp labitid.

Reisit to lavi depann lor twa,

Lor to bann aksion, to bann swa.

Pa les laper rant dan to latet,

Li kapav paraliz twa dan manier bet.

Pe inport sitiasion touzour pozitive,

Ek krwar ki to pou kapav arive.

Tou dan lavi se enn kestion volonte,

Kan to persevere fer zefor to pou zwenn sikse.

Dousman dousman, avanse letap par letap,

E sirtou pa les twa abat par move palab.

Toultan krwar dan tomenm,

Pa les twa detrir par problenm.

Touzour fonse pou realiz to rev,

Met de lavan seki to ete, evit lagrev.

Repons touzour trouv dan latitid,

Menm dan difikilte rest linpid.

Mo frer, mo ser, tomenm met to lavi,

Tan ki enan lespwar to kapav tini.

Lor to prosin touzour enan enn bon regar,

Menm bann ki met zot dan zar.

To bizin touzour akeyan ek zenere,

Enn labous, de zorey pran plis letan ekoute.

Lape, lamour trouv dan to leker,

Pran letan konn tomenm, to pou trouv to boner.

Aprann kontrol to santiman, fer le vid,

Sikse to lavi se zis enn kestion latitid.

Mo frer rasta

Mo frer rasta,

To enan rezon konbat pou to drwa.

Drwa pou viv kouman to oule,

Dan enn lemond kot lorgey preske trionfe.

Enan ki dir ki to zis kontan nisa,

Me twa fonse pa les zot andoktrinn twa.

Enn get twa ek regar ranpli ek prezize,

Mozonm lite ek fer rekonet to dignite.

Mo frer drapo laliberte lor ou latet,

Bien bon ou pa les ou anvoute par promes bet.

Retourn ver lasours ek rasazie ou,

Laverite se sel semin ki kapav donn gou.

Amouna zonmzo, debout ek lite,

Devan pwisans larzan pa kourbe.

Rastafari, filozofi kot zot kit tou pou viv leboner,

Zanfan, zenn ek grandimounn pa les zot swazir pa modernite zwazo maler.

Mo frer rasta, mo enan bokou pou aprann ek twa,

Anou tourn ledo ek lalwa ki fer par bann pwisan san lafwa.

Zot dir twa fer seki zot dir,

E pourtan zot inn fini vann to fitir.

Lanatir pe kriye twa, tann so lapel,

Li pe dir twa pa rant dan konstriksion dezienm tour babel.

Rasta to konnin ki valer to lidantite,

To enan karakter e to enn zonm ere.

Vinn rasta se pa zis finm mas,

Gard seve long, me se plito viv ek klas.

Rasta li pran letan pou apresie kreasion,

Dan so bote li dekouver so kreater an aksion.

Bann vre rasta donn lexanp,

Zot mars lor bon semin pa bor laranp.

Mwan mo inn swazir enn lot manier viv, me menm vwa,

Me mo respekte twa mo frer rasta. 

Resi enn martir

Li retrouv li tousel dan enn ti kwin,

Li kouman zako dan lamizik dan lasal lexamin.

Sis bananin pase dan lekol e li zis preskonn ekrir so nom,

Dan lekol tou zanfan sikann li, pran li pou kouyon.

Dan so latet personn pa kontan li,

Kifer parski li pa ris ek enan lekarir enn zeni.

Defwa li poz limenm bann kestion,

Souvan anvi sove al dan enn lot bastion.

Dan lakour, li pa gagn okenn lafeksion,

Zamin li’nn retrouv li dan bon sitiasion.

Enn zour pou narnien donn li enn bate kraz kraze,

Lezot, bann-la pa menm konnin si li existe.

Papa fini lake dan labwason inn vinn esklav boutey,

Manman osi kontan tape ek fini dope ek tifim ziskan gagn somey.

Lanin Nwel se zis bann mo ki penan okenn sans ek profonder,

So lavi rimin ek bann not lamizer ek maler.

Tou leswar avan dormi, li kas enn poz li mazinin,

Rev enn lavi san soufrans, omwin ziskan demin granmatin.

Personn pa pran letan ekoute ki li enan pou dir,

Parfwa li plore pa kapav tini, so soufrans bien dir.

Li pou grandi ek pa pou gagn so sans,

Sosiete inzis pou touy li ek so regar malsans.

Li enn viktim parmi plin lezot,

Zot kondann li san okenn fot.

Bann zanfan kouman li fini dan formantori ek kaso,

Sosiete fernm lizie lor so potansiel trouv zis so defo.

Bann gran sa lemond fer ennta diskour,

Li seki li pou tande se zis mazistra dan lakour.

Pou rasir li, li dir : « Bondie kontan mwan ! »,

Seki fer li plis soufer se parol destrikter ek move santiman.

Tou enn sistem esklavazis defoul li lor ti pov malere,

Me pa zordi pa demin li krwar enn zour li pou ere.

Bote lakreasion

Bote lakreasion,

Donn bon sansasion.

Melodi zwazo, bers lespri,

Parfin fler ansans li.

Later ek lamer ranpli ek lavi,

Gro kouman tipti, zot zoli.

Partou letour mwan tou parfe,

Kan nou atantif, nou konn apresie.

Later ek delo donn lavi,

Gro lelefan koman ti fourmi.

Larmoni prezan partou kot gete,

Ek dan trankilite lom saz trouv lape.

Bote larkansiel li fasinan,

Enn lien tise ant later ek lesiel.

So set kouler vreman etonan,

Kalite profon ek non siperfisiel.

Partou zoli zoli vu,

Lanatir swet lavi la bienvenu.

Verdir apez lafin lekor,

Ek permet zonm fer zefor.

Bondie met tousala dan nou lamin,

Donn nou sa kado yer, zordi ek demin.

E twa to enan to lekor,

Samem to pli gran trezor.

Lape se nou latitid natirel,

Laverite semin ver lesiel.

Tou seki inn kree bon,

Konn apresie bote lakreasion.

Reset nou sega lakordeon

Enn group lakordeon Rodrig

Lanbians sofe enn sel kout,

Tou ingredian reini pou resi al ziskan bout.

Saver ovan ek soulvan melanze pou donn bon gou,

Sof zaferla zanfan pou li nepli mou.

Dan laparans rouz, ver, zonn, ble ou oranz,

Tou kalite gou zwenn ansanm fer enn kari melanz.

Zis gete mem fer vwayaze, lipie kit later,

Ek so parfin to razie ek to planin dan lezer.

Lapo krose, vant ouvert fermin ek feray flite,

Bann ingredian prinsipal mixe, vir vire.

Tou eleman reini pou met enn lafaya,

Enn labav koule kann zis tann koz meni-la.

Kan dife-la alimin seki nwar vinn rouz,

Ti piman dan pos, vinn kadanse ennde pa blouz.

Enan enn plas pou tou seki oule,

Pa bizin ou gagn invite.

O son kili ling, kala lang, dibwa sofe,  

Laflam resofe, leker kapav vanin ek lekor pran dife.

Tournin tournin pou donn bon gou,

Penan okenn preparasion koumsa, kapav fer zalou.

Samem reset ek preparasion nou sega lakordeon,

Vini ekoute ek balans lerin, amize san moderasion.

Tanbour, lakordeon ek triang rezonin,

Tou dimounn debout danse, seki lorbor kapav tap lamin.

Le Déjà Vu

En un instant, je ressens une drôle de sensation,
Je suis figé et sens un genre de frisson.

« Il me semble avoir vécu avant cette scène,

Et je sais comment les évènements s’enchainent.

C’est comme une prémonition,

Un genre d’oracle ou de vision.

Le sentiment est clair et net,

« Est-ce un don ou simplement un instant bête ? »

Comme l’araignée, tu fais un bon en arrière,

Là, il faut prendre de la distance pour comprendre l’aventure.

Il te faut fermer les yeux en un moment éclaire et comprendre le tout,

Se rassurer faire un topo et se dire que l’on ne pas fou.

Devant nos yeux, le présent se défile,

De l’instantanée, nous recevons un coup-de file.

C’est comme le fait de se voir dans un miroir,

Et l’on sait endormi en nous un grand pouvoir.

Les psychologues disent que c’est un leurre, provoqué par des simples éléments,

Que cela arrive avant que le cerveau prend maitrise concrètement d’une situation.

D’autres jouent la carte du don et parle de réalités divines,

Mais c’est tout simplement une expérience intéressante, pas anodine.

Ce cours instant fait beaucoup parler de lui,

C’est difficile à expliquer, le mystère qui l’entoure, nous l’aimons tous.

Il s’est fait communément appeler comme déjà-vu,

Certain en ont peur, ne sachant pas quand ça vient, nous le connaissons tous.

Papi mersi

Mo papa
Enn zonm, mil prinsip 

Mo pou touzour rapel sa zour-la,

Larmi ti koule dan to lizie kan to ti pe exprim twa.

Sa zour-la mo ti pe fer enn gran pa e to ti la akote mwan,

E depi sa zour la zamin to inn abandonn mwan.

Par to parol ek to lekzanp touzour to’nn gid nou.

Pou tou fami to’nn aksepte sanz tou.

Gras a twa ki zordi mo inn ariv la,

Mo bien kontan enan twa kouman papa.

Nou pa ti ris me zamin nou’nn mank narnie.

Kan nou ansam nou pli gran rises se Bondie.

Zamin to’nn les mwan tonbe papi,

To’nn ed mwan pou donn sans mo lavi.

Penan ase mo pou dir twa mersi,

Se gras a to prezans ek to soutien ki mo la zordi.

To inn aprann mwan respekte mo bann langazman,

E touzour lite pou amenn sanzman.

Mo rev zordi seki to touzour zwaye,

Kan to pans tou seki ansam nou inn realize. 

Mo reisit papi se ousi to reisit,

Avek twa letan inn pas bien vit.

To inn ed mwan pou devlop enn gran lafwa,

Kot mo ale dan mo zorey mo tann to lavwa.

To touzoun inn oule boner to bann zanfan,

E mo swete ki touzour nou pou rekonesan.

Avek twa mo konpran ki limportans enn papa,

Kan li la e li zwe so rol zanfan kapav grandi ti pa ti pa.

Mo papa pou mwan li vremem enn gran model,

Gras a li ki zordi mo pe pran simin lesiel.

Mersi mam

Mo manman
Pli zoli fanm ki mo konin

Mam se manier ki mo appel twa,

Mam se koumsa ki mo leker dir mwan dir twa.

Mo anvi dir twa mersi pou tou seki to finn fer pou mwan,

Mo anvi dir twa mersi pou seki to ete pou mwan.

Tou-le-tan to donn bann bon konsey,

To lavwa zamin li pa rezonn dan mo zorey.
manman to mem kinn fer mwan dekouver ki mo ete.

Mam to ine ed mwan batir mo lidantite.

To mem mo pli gran trezor e kot mo ete mo mazinn twa,

Mam, mam, mam zame mo fatige krie twa.

Mo kontan twa, to mem mo larenn,

To mo rekonfor kan mo dan lapenn.

Penan mo pou mo dire twa ki kantite mo kontan twa,

Penan parol pou mo exprim mo lamour pou twa.

Me les mo sey explike avek sa bann parol,

Les mo koze, les mo zwe mo rol.

Mo sir ki Bondie li existe parski a traver grander to leker,

Mo dekouver ki lao bizin enan enn bon kreater.

Mam kot to gagn lafors pou to konbat?

Gras a twa mo gagn kouraz depi ki mo mars katpat.

E tou bann zanfan ki penan mamam mo konpran zot solitid.

Parski san twa mam dan mo lavi ti pou enan enn gran vid.

Mo sagrin ki zamin mo pran letan pou exprim mo santiman,

E ziskan ki mo gagn kouraz pou fer li mo dir twa mersi manman.

La liberte

Moniman bann esklav dan Linion 

La liberte se fakilte ki nou enan pou deside,

Pou deside de seki pou permet nou viv ere.

Kan nou pran desizion sa li permet nou grandi,

E nou epanwi e kapav donn enn sans nou lavi.

La liberte li enn kado pou sak imin,

E li permet nou vinn met nou prop destin.

Li enn kado ki fer ki zistwar sak dimounn li sakre,

Nou lib pou dir e fer seki pou permet nou viv ere.

Me mem la liberte enan so bann limit,

Ki nou dekouver dan lavi ek so bann sapit.

Viv lib pa vedir nou kapav fer nimport kwa,

Nou apele pou respekte lezot ek bann lalwa.

Nou lib pou viv nou lavi pou nou prop bien,

Laliberte fer nou vinn met nou prop destin.

La kot nou ete nou kapav viv dan enn manier lib,

Malgre bann kontrint la sosiete tou rest posib.

Nou touzour kapav azir mem avek ennta restriksion,

Touzour lib pou panse e apre reflexion pas a laksion.

Zordi nou lib pou deside seki demin li pou ete,

E touzour nou pli gran kado, li pou rest la liberte. 

Satan

Satan li tonbe depi lesiel,

Li pe sem dezord lor later.

Linn kree enn lemond artifisiel,

Larout amenn direk ver lanfer.

Satan vini pou tant zom ek fam,

Li anbet zot, perdi zot e pran zot nam.

Me seki mars dan simin Bondie li proteze,

Mem si satan vini avek toutsort mesanste.

Enan mem kinn vinn bann zanfan satan,

Zot vener lemal ek enan move santiman.

Par bann pratik diabolik zot rod gagn tou,

Vers disan fer mazik kre divizion ant nou.

Satan, diab, lisifer bann nom pou lespri lemal,

Zoli later ki kreater inn kre li fer li vinn sal.

Me so zour li konte e lipe tranble kot li ete,

Parski li konin lalimier lavi pou trionfe.

Tou bann zanfan satan pou plore e ledan pou grinse,

E zot pou regrete zot inn swazir pou renie laverite.

Tou bann kipa respekte lalwa sakre e bann komandman,

Zot pou kriye e brile dan dife se sa zot kondanasion.

Bann ki lor zot fron penan sign zanfan lape,

Zot pou gagn met deor depi Rwayom.

Seki marke avek sif lemal nepli pou enan kran,

Zot pou koule ek al dan lanfer avek zot met satan.