NOU PA TOU PWISAN

Nou pa tou pwisan,

Nou feb ek frazil

Enn trezor dan enn vaz larzil

Kifer nou deklar gran ?

Pe inport oter nou monte

Enn zour nou tonbe

Seki zordi fer vantar

Demin plonz dan marenwar

Lavi enan de o de ba

Linportans seki nou viv lafwa

Seki arive nou kontign espere

Azir avek determinasion enn amoure

Kifer enan otan soufrans ek violans ?

Kifer mank lape ek tolerans ?

Seki for dominn seki tipti

Partou enan laenn ek zalouzi

Nou pa tou pwisan

Nou zis laser ek disan

Zordi enn ale demin enn lot

Pa tonm dan foli grander vouzot

Ki serti gagn lemond ek perdi nou nanm

Gourman rises fer gran misie gran madanm

Ki nou pou amenin kan nou ale ?

Bann lezot ki pou diverti amize

Anou pran letan viv

Avek lamour ekrir nou liv

Vre relizion se kontan san zizman

Avek imilite aksepte ki nou pa tou pwisan

+Jean Rex Casimir

Dimans 14 Fevriye 2016 

TRAP MO LAMIN PA LARGE LESPERANS

Trap mo lamin Lesperans

Sinon mo pou absorbe par soufrans

San twa pa pou resi tini kou

Avek twa ki pou viv mo enan gou

Vini ek to zoli rob kouler lamour

Pran mwan dan to lebra toulezour

Mo kontan trouv to zoli kolye lafwa

Sa donn mwan kouraz amenn mo lakrwa

Mo tonbe leve to tini mwan

Sa donn mwan kouraz al de lavan

Mo konnin ek twa mo pou al ziskan bout

Mo lavi nepli enn routinn me enn larout

Tou pa pass kouman mo oule

Anba pwa maler defwa mo pliye

Twa mo bon zami to redonn mwan konfians

Touzour to donn mwan enn sans

Enan zour mo anvi zet lekor

Reste la atann lamor

Me to melodi dir mwan leve

« Leve ek kontign avanse »

To regar toultan enn regar tandres

Tou to bann konsey ranpli ek sazes

Mo dir twa mersi zamin to ziz mwan

Kan mo negatif to pasifie mo santiman

Kan to la mo dan lazwa 
Kan to pran mwan dan to lebra
Mo latet poze lor to leker

Mo krwar ki mo inn fer pou boner

To ed mwan get laverite an fas

Mo kapav get mwan dan laglas

Avek seki mo ete to ranforsi mo lekperyans

Trap mo lamin pa larg mwan lesperans

+Jean Rex Casimir

Zedi 4 Fevriye 2016