Dekourazman

Dekourazman,
Kouman enn montagn siman.
Tou rev evanoui,
Nou baskil dan lannwi.

Fiz nou anplas,
Li pran tou plas.
Refrain se 'Tou inn fini,
Mo inn plin ek mo lavi'

Me 'Ey, repran twa,
Ki pe ariv twa?'
Kisennla ti dir tou pou roz,
Eski to krwar lavi rim ek Kas poz?

Limem zouti préféré satan,
Li bien kontan zwe kart dekourazman.
Fer nou krwar nou tou pwisan,
Apre fer krwar nou inpotan. 

Fixe toultan lobzektif,
Pans touzour pozitif,
Kan to oule to kapav,
Mem to fer erer pa grav!

Tonn nesans lamin leze,
Tou seki to enan pou ale.
Viv dan enn manier realis,
Pa atas twa ek to lego anplis.

Tou separasion fer dimal,
Kouraz li pa fatal.
Dan to leker kiltiv bon santiman,
Sirtou évit dekourazman.

+Jean Rex Casimir 

Mardi 7 Oktob 2014

Oner bann fanm zordi

Oner bann fanm zordi,

Pou pwa temwaniaz zot lavi.

Par seki zot ete,

Zot interpel tou limanite.

Mersi bann fanm ki donn lavi,

Avek kouraz zot ed zanfan grandi.

Bien defwa met ousi palto papa,

Fanm determinin ki apiy lor lafwa.

Bravo bann fanm debriye,

Ki kontribie pou fami avanse.

Lev boner prepar manze,

Fer louvraz, met lord ek trase.

Bann fanm ousi direktris,

Avek elegans zot rann servis.

Zot enan lamour travay bienfe,

Fer gran kitsoz ek zot ledwa fe.

Fanm lontan ousi ti enan gran kapasite,

Zordi zot epanwi parski zot enan plisliberte.

Tou merit viv dan enn latmosfer kotenan legalite,

Dan tou dimounn zot kapv briye.

Avek zot sansibilite maternel,

Zot fer bann etinsel.

Leker ranpli ek lanpati,

Enn verite ki tou fanm zoli.

Mo rann omaz bann fanm yer,

Ki dan zardin listwar zordi bann zolifler.

Sak zonm ki reisi,

Par deryer enan enn fanm ki pe pous li.

Tou fanm enn gran trezor,

Ki merit gagn trete pli bien ki lor.

Gran mersi lor nou larout inn enan bannfanm,

Avek mo poezi mo oner tou bann fanm.

+Jean Rex Casimir

Mardi 30 Septanm 2014