Ladilter

Ladilter pe kree bokou dezord dan sosiete,

Dan langazman maryaz bokou pa viv fidelite.

Dir wi pou le meyer pou le pir avek foste,

Parol bien zoli me dan leker get zis lintere.

Enn panse malsin, enn regar malelve,

Apre sa enn aksion fer zis pou sansualite.

Ladilter samem pli gran pese,

Ki kapav komet lor later Bondie.

Misie koman madam zordi infidel,

Andeor Maryaz zot rod plezir sexuel.

Li normal pou zot manz banann dan debout,

Sanz direksion lor ronpwin ek al lor fos larout.

Seki pe viv fidel zot merit enn meday,

Parski zot respekte mem pli tipti detay.

Pilie enn relasion senn se respe, fidelite ek konfians,

Kan lorgey ki dirize reaksion seki pou enan defayans.

Zanfan nesans pa kone ki sannla papa,

Akoz enn bann dam san lafwa ek lalwa.

Bann move garson osi fer bokou dega,

Pou zot sem dan zardin vwazin se enn drwa.

Zordi ankor frwi defendu li ankor enn me prefere,

Zom kouman fam pe fasilman less zot tante.

Akoz zot mesanste ek gormandiz, zot tom dan lerer,

E partou kote enan bokou ki pe komet ladilter.

+ Jean Rex Casimir

31 Oktob 2011

La sexualite

La sexualite pou bokou li penan sekre,

Me eski zot vremem ki to ete?

Avan atenn laz adilt fini gagn relasion sexuel,

E seki interes zot se zis plezir sansuel.

La sexualite permet nou dir wi pou lavi,

Wi pou viv li e permet li touzour grandi.

Nou enan kapasite dan nou pou transmet lavi,

Nou apele pou epanwi dan enn fami.

Dan maryaz kouman kom selibater,

Nou apele pou viv enn sexualite sinser.

Enan purte dan nou leker kouman dan nou regar,

Viv enn sexualite responsab li enn sians ek enn lar.

La sexualite pa egal la sansualite,

Se plito viv nou langazman ek fidelite.

Gras a vertu chastete nou viv enn bon sexualite,

Nou apran metriz nou mem e viv dan laverite.

Ledikasion sexualite zordi li enn nesesite,

Sa li permet nou dekouver nou vre lidantite.

Sak dimounn merit viv enn sexualite ki responsab,

E sa permet enn bon devlopman ki vreman durab.

Enan per, lot bann sot brit ek enan bien epanwi,

Par nou sexualite nou apele pou transmit lavi.

Dan enn fason spiritiel, ekilibre ek bokou limanite,

Lasazess ek limilite permet nou viv enn bon sexualite.

+ Jean Rex Casimir

23 Oktob 2011

To tou pou mwan

To tou pou mwan

Kan mo santi mwan tousel mo enan enn kamarad pou konsol mwan,

E kan mo dekouraze to rasir mwan e fer mwan gagn plis kran.

Dan bann moman pli dir dan mo lavi, to’nn touzour la,

Mo krwar ki tou posib kan mo mars lor mem pa ki twa.

Kan dan mo lavi mo trouv tou pe ekroule, to mo sover,

Dan tanpet lavi, kan pirog mo leker derive tomem mo reper.

To ros kont mo’nn anrasin fondman mo lavi,

Mem siklonn tape mo pou kapav res an plas tini.

Dan freser dan marenwar aswar, mo napa gagn per,

To mem ki resof mwan, tomem mo lalimier.

Twa ki donn gou mo lavi e fer mwan existe,

San twa ti pou fad e mo pa ti pou vo narnie.

To mem mo lamour, to mem mo sekour,

Kan mo avek twa mo leker nepli lour.

Parfwa mo santi mo leker brize dan mil bout,

Avek patians to rekol li ziskan pli dernie ti bout.

San twa ki mo ti pou ete e kot mo ti pou ale,

To konn mwan par ker, to plis ki mo lamwatie.

Avek twa dan mo kote, mo pou al lwin.

Mo sir esterla ki to mem mo destin.

+Jean Rex Casimir

15 Oktob 2011

Ki to ete

Ki to ete twa, parfwa to demann twa,

Parfwa to latet fatige e to kestionn twa.

Ki to ete e kifer to la, to anvi konin,

E eski vremem to met de to prop destin.

Sak zour ki vini to lavi vinn deplizanpli konplike,

Eski enn zour lor later to pou konin kete laverite.

E kifer lor later penan lape ek otan lamizer,

Eski later avek letan li pou vinn pli meyer?

Bann gran kestion partwa enan ti repons,

Enn simp ti lalimier kapav apre enn gro mons.

Lavi li enn mister ki nou dekouver avek letan,

Seki fer nou pli imin se kan nou metriz nou santiman.

Sak segond pase lor later, li pou nou enn kado,

Si nou la, seki nou apele vinn bann gran ero.

Par nou liberte, nou kapav pran bann desizion,

Deside pou koze, rest trankil ou pass a laksion.

Kreasion lemond li pa enn mister, sa form parti enn plan,

Avek inpe kran ek kreativite nou kapav amenn sanzman.

O fon sakenn dantre nou enan enn trezor ki pe repoze,

E lakle de to lavi, se dekouver lor later ki to ete.

+ Jean Rex Casimir

31 Oktob

Zezi

Zezi limem la limier laverite ek lavi,

Avek li tou dimounn grandi ek epanwi.

Li enn kamarad sinser pou sakenn de nou,

Kouman enn sel fami li rasanble nou tou.

Mision Zezi lor later se amenn lape,

Li’nn vini pou ki tou dimounn sove.

Zezi vinn rezwenn nou kot nou ete

Li kontan nou koman nou ete.

Bann aveg trouve, bann seki bwate marse,

Bann sourd tande, bann seki mie koze.

Zezi li liberasion pou tou bann oprime,

Li’nn viv avek bann seki dan povrete.

Zezi pa get figir e li pa fer diferans,

Li pa ziz nou dapre nou laparans.

Kan nou al ver nou prosin ek enn bon leker,

Se la ki nou dekouver Zezi kouman nou protekter.

Avek Zezi dan nou kote tou posib,

Selwi ki mars avek Zezi vremem viv lib.

Zezi permet nou donn enn sans nou lavi,

Sak dimounn ki lor later, li apele pou swiv Zezi.

+ Jean Rex Casimir

31 Oktob 2011

Pans pozitif

Pans pozitif pe inport seki arrive dan to lavi,

Tou lexperians ki to viv zot la pou permet twa grandi.

Kan to tonbe to kapav plore me avek kouraz relev twa,

To pou konn lesek, soufrans, la penn me gard lafwa.

Lavi li zamin pa pou roz pou twa, to pou bizin konbat,

Konbat tou bann ki pou anvi desid pou twa, bann pirat.

Kan to anvi amenn sanzman zot pou riy twa,

Me konfians, krwar dan twa pa bess lebra.

To pou zwenn osi bann tret ki malonet e bien foser,

Fer seki zot dir me pa fer seki zot fer sa bann manter.

Zot vini pou vol to rev, fer twa krwar touletan ti koumsa,

Me avek zefor ek sinserite to pou reisi, kontign krwar dan twa.

Si to la, to enan enn mission pou akonplir isi lor later,

Avanse e zamin pa rekiler mem kan to gagn per.

Gagn per pa enn sign febles, li permet twa gagn kouraz,

Dan lavi kan to oule, to resi touletar azir bien saz.

Tousel to pa kapav fer narnien, swazir bann kamarad ki serye,

Ansam avek zot to pou resi vremem amen lamour ek lape.

Pa atann ki problem arrive pou to reazir, to bizin proaktif,

Kree bann nouvo kitsoz, fer bann revolusion e pans pozitif.

+Jean Rex Casimir

31 Oktob 2011

Misie Kankrela

Misie kankrela touletan abiye dan so zoli kostim,

Sorti chic pou li se enn de so bann koutim.

Li paret ki li bien saz ek ki kapaz fer li konfians,

Li bien diskre me mefie ou de so laparans.

Dan lizour ou pa mem kone kot li ete,

Me aswar li vini e li komans mars marse.

Kan to dimounn in al dormi lerla misie aparet,

Li pou ale vini e dan ou lakaz li pou fer fet.

Li pa mem fer kone, li pran direksion la kwizinn,

Par manier li azir pou dir sirman li frer ou ti kouzinn.

Li pa lav so lamin li nek rant dan lasiet li manze,

Enn ti miet par si en lot par la, pa tarde pou li rasazie.

Misie bien polivalan li adapte dan tou lanvironnman,

Par so diskresion, ou pou dir misie la bien galan.

Li pa pou fatig par enn ta tapaz,

Me tansion « monsieur aime faire des ravages ».

Kan li vini se pou fer dega, li pans zis limem,

Manz tou rant partou pou li pa enn problem.

Dilo dormi enan gran kouran fer atansion,

Avek li meyer solusion se zwe kart prevansion.

Li enn gran gourman konesans pou li grandi,

Li pa kontant li lir ou liv, li osi manz li.

Dan fon ou larmwar osi li satisfer so lapeti,

Li vini griniot griniote mem dan ou ti bai.

E li bien komik kan misie-la devire,

Li pa fouti resi releve e kontinie.

Kan li vini li pa la pou mwan ni pou twa,

Se zis pou satisfer so lapeti misie Kankrela.

+ Jean Rex Casimir

31 Oktob 2011

La liberte

La liberte se fakilte ki nou enan pou deside,

Pou deside de seki pou permet nou viv ere.

Kan nou pran desizion sa li permet nou grandi,

E nou epanwi e kapav donn enn sans nou lavi.

La liberte li enn kado pou sak imin,

E li permet nou vinn met nou prop destin.

Li enn kado ki fer ki zistwar sak dimounn li sakre,

Nou lib pou dir e fer seki pou permet nou viv ere.

Me mem la liberte enan so bann limit,

Ki nou dekouver dan lavi ek so bann sapit.

Viv lib pa vedir nou kapav fer nimport kwa,

Nou apele pou respekte lezot ek bann lalwa.

Nou lib pou viv nou lavi pou nou prop bien,

La liberte fer nou vinn met nou prop destin.

La kot nou ete nou kapav viv dan enn manier lib,

Malgre bann kontrint la sosiete tou rest posib.

Nou touzour kapav azir mem avek ennta restriksion,

Touzour lib pou panse e apre reflexion pas a laksion.

Zordi nou lib pou deside seki demin li pou ete,

E touzour nou pli gran kado, li pou rest la liberte.

+Jean Rex Casimir

30 Oktob 2011

Lapriyer pou tou dimounn

Lapriyer pou tou dimounn

Bondie fer mwan vinn enn ouvrier lape,

Kot enan laenn mo pou met lamour,

Kot enan ofans mo pou amenn pardon,

Kot enan konfli mo pou amenn linite,

Kot enan erer mo pou amenn laverite,

Kot enan dout mo pou amenn lafwa,

Kot enan dezespwar mo pou amenn lesperans,

Kot enan teneb mo pou met lalimier,

Kot enan tristes mo pou amenn lazwa.

Bondie ki mo pa rod zis konsolasion me ki mo konsole,

rod konpreansion me ki mo konpran lezot,

rod lamour me ki mo kontan lezot.

Parski se kan mo donnin ki mo gagnien,

Kan nou bliye noumem ki nou retrouv nou,

Kan nou pardone ki nou gagny pardon,

Kan nou mor ki nou reviv dan la vi eternel.

Lapriyer inn ekrir par François ki’nn nesans an 1181 e mor an 1226

Tradwir an kreol Rodrige par + Jean Rex Casimir

Ti Mamzel

Ti mamzel

Ti mamzel to trouv twa pe vinn deplizanpli gran,

To pe koumans resanti bann nouvo santiman.

To pe grandi de zour an zour,

Bann ti zennzan pe komans fer to letour.

To’nn resevwar to bann premien let damour,

Ennta Romeo pe vini avek bann zoli ti-diskour.

To enn gran trezor ki vo bokou,

Me sertin pe pran twa pou enn zouzou.

Tosi to’nn komans met to zoli ti bataz,

Enan kan trouv twa anvi fer paryaz.

Kot to ale tou lizie lor twa,

Sirtou kan to'nn met to rob laswa.

To vreman enn zoli ti negress,

E to’nn grandi anplin larzess.

To paran tret twa kouman enn laprinsess,

E zot inn aprann twa koman viv ek politess.

To kuriez, anvi sey tou ek amize,

Me panse kot to sorti e ki to ete.

Souvan to kontan pass pou enn top-model,

Me touletan reflesi avan to azir zoli ti mamzel.

+ Jean Rex Casimir

29 Oktob 2011

Lekol Paran

Lekol paran

Lekol paran zordi plis ki enn nesesite,

Devan bokou sitiasion paran debousole.

Pa konin kot pou ale ki pou fer,

Parfwa mem pa konin ki pou dir.

Paran to responsabilite se grandi to zanfan,

Aprann li devlop bann bon santiman.

Enan defwa to anvi konpran zot,

Seki zot dir e fer li pa to fot.

Trouv to zanfan ere samem fer to lazwa,

E pou zot al pli divan to fer lie k lafwa.

Avek plis lakonpagnman to pou reisi dan to vokasion,

Tro souvan zot tousel e devan problem penan solusion.

Bann paran zot pa koupab, parfwa zis dezarme,

Sak zour zot bizin afront bann gran realite.

Paran zot mem bann ouvrier ek batiser lavenir,

Zot enan pouvwar gid zot zanfan ver enn bon avantir.

Parfwa zot santi ki zot pe kriye dan dezer,

Regroup zot partaze e sirtou pa gagn per.

Bizin ekip paran pou zot lepanwisman,

E zot merit ki met debout enn bon lekol paran.

+ Jean Rex Casimir

23 Oktob 2011

San laverite penan lamour

San laverite penan Lamour

San laverite penan lamour,

Mem avek bann pli zoli diskour.

Dan tou bann relasion respe ek konfians importan,

Sinon kapav may dan tout sort santiman.

Tou dimounn bizin viv dan lalimier,

Parey kouman delo lasours leker bizin sinser.

Ant seki nou dir ek fer bizin enan koerans,

Lamour bizin viv dan fransiz ek transparans.

Kan nou kontan bizin kapav donn tou,

Aprann konn dimounn nou kontan ek pa zalou.

Avek lamour nou santi nou responsab,

Ek pa let aksepte tout sort palab.

Lamour se kan nou viv dan fidelite,

Ek touletan azir dan lakorite.

Lamour se pa selman gagn plezir,

E pa zis viv pou konble bann dezir.

Pli gran prev lamour se kan nou donn nou lavi,

Dan lamour li enn lazwa transmet lavi.

Kan nou dekouver ki ete lamour,

Nou konn vre rezon nou parkour.

Lamour permet nou sak zour vinn pli imin,

Ansam avek lezot nou kapav konstrir demin.

Nou lor later pou enn ti sezour,

Kot san laverite penan lamour.

+ Jean Rex Casimir

23 Oktob 2011