Plas mo pep dan mo leker

Plas mo pep dan mo leker,

Li pli imans ki liniver.

Sak zour mo remersi li,

Avek seki li ete li inn fer mwan grandi.

Kan mo marse lor semin,

Mo plonze dan enn lexperyans imin.

Sak rakont pou mwan manifik,

Nou met dialog, koze riye, li fantastik.

Avek saler touzour nou akey lezin lezot,

Enn sourir, enn ti partaz, nou riye enn zoli not.

Mo pep enn pep kourtwa ki pran letan apresie,

Zamin li prese, enn pa apre lot li avanse.

Li arive ki enan bann friksion nou pa parfe,

Me kan enan enn ka, nou marye pike ek solidarite.

Dan vilaz ou dan lasosiason dimounn disponib,

Isi zwenn pou enn bon moman li ankor posib.

Dimounn dan tou bann rezion souvan zwenn ansanm,

Kouman enn sel fami nou met enn bon laganm.

Nou tou nou santi nou apartenir a mem kominote,

Kouman kouler larkansiel enan linite dan diversite.

Li enn plezir ekout enn matant rakont zistwar lontan,

Oubien avek enn tonton partaze, pas enn bon moman.

Bann zenn kot nou zot solid ek dinamik,

Kan tou zenn zwenn li enn moman inik.

Pou mo pep mo resanti zis lamour,

Mo dir sa plis par mo aksion ki bann diskour.

Mo swe pou mo pep se enn meyer lavenir,

Touzour pou enan enn gran plas dan mo leker.

+Jean Rex Casimir

Samdi 5 Ziye 2014 

Mo krwar dan lazenes

Mo krwar dan lazenes,

Ki pli gran de tou bann rises.

Lazenes se nou fitir,

Se avek li ki lavenir li pou batir.

Sak zenn se enn kado,

O fon sakenn enan enn ero.

Sakenn inik ek so talan,

E zot tou intelizan.

Mo krwar dan lazenes,

Enn lazenes ki konn so lafors ek so febles.

Lazenes ki enn lafors trankil,

Kan li leve narnien pa pou difisil.

Sak zenn enan so kapasite,

Ki li kapav met o servis limanite.

Lerla ansanm nou kre enn mond meyer,

Kot nou tou kapav viv an frer.

Dan lesiel sak imin enan so zetwal,

Nou mission fer li briye ek pa vinn pal.

Lavi se alafwa enn konba ek enn trezor,

Li enn siksesion de bann moman for.

Mo krwar dan lazenes,

Ki apele pou resi so lavi ek sazes.

Mo krwar ki se bon swa ki fer reisit enn lavi,

E ki desizion apropriye fer nou grandi.

Lazenes ranpli ek potansiel,

Li epanwi kan li renons a seki siperfisiel.

Lazenes se vreman nou pli gran rises,

Ek konviksion mo krwar dan lazenes.

+Jean Rex Casimir

Samdi 28 Zin 2014