Mo pou dir

A zonm ek fanm ki pe viv ek ranker,

Mo pou dir fer lamour pa lager.

A bann ki bann don bon lexanp,

Mo pou dir stop zot pe al dan laranp.

Mo frer ek ser ki pov dan lamizer,

Mo pou dir gard lespwar parski zot pou sort dan maler.

Selwi ki malad ek pe soufer,

Mo pou dir gard lape dan to leker.

Mo partner kamarad zenes ki dan problem,

Mo pou dir sorti dan sa dilem.

Fer touzour bann bon swa,

Ek sirtou gard toultan lafwa.

Sa ti zenn ki inn krwar so leker inn brize,

Mo pou dir ep, releve ek kontign marse.

To lavenir dan to lamin,

Twa ki diriz to destin,

Selwi ki anvi swiside ek fer fini ek lavi,

Mo pou dir pa azir ek ranker, seki meyer pe vini.

Sa ti mamzel ki souvan koup li ek razwar,

Mo pou dir li swazir lalimier ek rezet marenwar.

Me sa zanfan ki inn viole dan so laser par so prop fami,

Avek ki mo, mo pou kapav rasir li.

Selwi ki inn rezete ek pe viv lor lari,

Par ki parol, mo pou kapav ed li tini.

Avan tou parol aksion neseser,

Seki esansiel se lamour dan enn rankont sinser.

Par nou sinp prezans aktiv nou kapav balye lamizer,

Mwan par mo temwaniaz se sa ki mo pou dir.

Omaz pou Nelson Mandela

Nelson Mandela,

Zordi to’nn trouv to plas parmi bann lerwa.

Dan to vilaz, dimounn ti kriye twa Madiba,

Zot ti konn twa depi ki to tibaba.

Madiba to inn grandi avek enn rev dan to latet,

Rev kot bann zom pou frer ek non esklav ou met.

Bizin ziz enn zom par lafors so karakter,

Ek non par so laparans, so kouler.

To ti enan enn gran vizion,

Ek  to paran inn asire to gagn enn bon ledikasion.

Dan lekol to inn persevere pou to arive,

To inn fer bokou zefor pou ki to avanse.

To inn trouv devan to lizie bokou linzistis,

Ek twa to inn angaz twa pou lazistis.

Metie to inn swazire apre reflexion se avoka,

Pou defann bann ki inonsan me koupab devan lalwa.

Vit to inn debout pou denons le mal,

To inn swazir non violans ek semin laverite.

Se la ki bann mesan inn tonm lor twa an rafal,

To inn al fermin parski to inn koze dir seki vre.

Venn-set-an to inn pase deryer baro,

Parski to inn oz rev linite to inn al dan kaso.

Me mir prison pa inn resi touf laverite,

Lamour inn pli for ek to inn trouv to liberte.

Zordi Madiba to enn gran model pou limanite,

Seki to inn fer enn gran linspirasion, twa gran mesaze lape.

To lavi enn zoli mesaz, enn gran konba,

Se pousa zordi nou rann twa omaz Mandela.

+ Jean Rex Casimir

Dimans 7 Ziye 2013

©

Pornografi

Tablo lor Lakreasion Michelangelo

Pornografi,

Pir de bann grafi.

Imin ki vedet,

Vinn pli pir ki bebet.

La penan okenn pasion,

Me total perversion.

Lekor transform an poubel,

Enn malpropte dan lemond vertiel.

Tanp vandalize,

Perdi tou so valer sakre.

Se enn vre sakrilez,

Fer san oken santiman mal-a-lez.

Pornagrafi,

Pir de bann grafi.

Fer fles sansasion monte,

Kan gete anvi seye.

Nivo move panse grinpe,

Ek regar fini vwale.

Enn dife lapay alimin,

Ek li konsom tou lor so semin.

Lekor ki enn mervey,

Vinn enn sinp obze,

Ki servi  pou amize,

Seki gete lizie trouv tey.

Move zimaz li abat lespri,

Dan relasion amenn zizani.

Pou ki enan larmoni,

Bizin rezet pornografi.

+Jean Rex Casimir 

Sex avan maryaz

Sex avan maryaz,

Li zis enn badinaz.

Gagn inpe plezir pas a laksion,

E la refiz pran definitivman langazman.

Lekor ki enn tanp sakre,

Nek vinn enn sinp zwe.

Pran enn nisa badinn enn kou,

Apre sa gagn degou.

Enn ti moman fek zwenn,

Fini gagn anvi enan enn relasion.

Zis apre plas pou regre ek lapenn,

Aster se laont ek move lemosion.

Enan dir nou seye gete si marse,

Kan dout ek lape ki met, penan sikse.

Kan inn koumans papiyonin pa kapav arete,

Konsekans seki nek zis kont konte.

Vre lamour, samem ki pilie,

San li relasion pa otantik ek konkre.

Fidelite ek konfians vinn sirmont tousa,

Devan Bondie zot ini o nom lafwa.

Maryaz se lak ki sel enn vre lamour,

De dimounn desid pou viv ansam pou touzour.

Maler lor seki separ seki Bondie ini,

Kan nou met lalians nou dir wi pou lavi.

Sex andeor maryaz so rezilta se destriksion ek konfizion,

Li men ver instabilite, seksialite alor bien lwin ek so vokazion.

Alor anou swazir lapirte, sinserite ek enn lavi saz,

Pou ki lamour trionfe anou dir nou sex avan maryaz.

+ Jean Rex Casimir

Dimans 23 Zin 2013

Seki esansiel se lamour

Seki esansiel se lamour,

Li vital lor nou parkour.

Lamour donn lavi,

Fer li vinn sinp ek zoli.

Zis lamour neseser,

Limem amenn boner.

Seki viv li enan tou,

Lamour se enn tou.

Lamour pran pasians,

Li repoz lor konfians.

Lamour se aksepte,

Ek ousi respekte.

« Mo kontan twa ! »

Samem pli zoli fraz.

Li ranpli leker ek lazwa,

Fer nou vinn bien saz.

Seki enan tou,

Pran zot pou lerwa.

Zot fer fezer partou,

Li initil si personn pa kontan twa.

Lamour se pli ki enn sansasion,

Lamour se apresie ek pasion.

Se enn lafors ki sanz to regar,

Li alafwa enn sians ek enn lar.

Lamour li filozofik,

Anmemtan manifik.

Li totalman natirel viv lamour,

Seki esansiel se lamour.

Mersi mam

Mam se manier ki mo appel twa,

Mam se koumsa ki mo leker dir mwan dir twa.

Mo anvi dir twa mersi pou tou seki to finn fer pou mwan,

Mo anvi dir twa mersi pou seki to ete pou mwan.

Tou-le-tan to donn bann bon konsey,

To lavwa zamin li pa rezonn dan mo zorey.
manman to mem kinn fer mwan dekouver ki mo ete.

Mam to ine ed mwan batir mo lidantite.

To mem mo pli gran trezor e kot mo ete mo mazinn twa,

Mam, mam, mam zamin mo fatige kriye twa.

Mo kontan twa, to mem mo larenn,

To mo rekonfor kan mo dan lapenn.

Penan mo pou mo dir twa ki kantite mo kontan twa,

Penan parol pou mo exprim mo lamour pou twa.

Me les mo sey explike avek sa bann parol,

Les mo koze, les mo zwe mo rol.

 Mo sir ki Bondie li existe parski a traver grander to leker,

Mo dekouver ki lao bizin enan enn bon kreater.

Mam kot to gagn lafors pou to konbat?

Gras a twa mo gagn kouraz depi ki mo mars katpat.

Mam mo dir twa enn gran mersi,

To inn fer tou pou mo reisi mo lavi.

To inn permet mwan vinn enn zom for,

Ek mo felisit twa pou tou to zefor. 

E tou bann zanfan ki penan mamam mo konpran zot solitid.

Parski san twa mam dan mo lavi ti pou enan enn gran vid.

Mo sagrin ki zamin mo pran letan pou exprim mo santiman,

E ziskan ki mo gagn kouraz pou fer li mo dir twa mersi manman.

Letan pas vit

Letan pas vit,

Lespas pou li pa enn limit.

Kouman enn zekler,

Li ale vites lalimier.

Lanfans, ladolesans, lavieyes,

Letan li la pou amenn sazes.

Vit enn lavi pase,

Enn vini, lot ale.

Letan ki nou perdi

Li pa revini.

Letan anvole ale,

Leprezan sed plas lepase.

Kouman enn pelerin,

Li mars vers so destin.

Li touletan avanse,

Zamin li rekile.

Dan komans li ti la,

Depi sa li pa inn for fopa.

Linn akonpagn sak zenerasion,

E linn kondir zor ver simin liberasion.

Depi komansman li la,

Li debout avek so lalwa.

Dan tribinal lavi limem temwin,

Nou tou nou pe mars ver nou destin.

Bann gran orgeye,

Vit vit zot nepli existe.

Mem avek pouvwar zot larzan,

Napa kapav aret letan.

Dan enn instan to lavi defile,

Gong sonin inn ler pou ale.

Koman enn zitan li pourswiv so simin,

Laliberte so konpagn, li pa atase ek narnien.

Laverite so gran kamarad,

Avek zot pa fer parad.

Li pa met okenn sit,

Letan pas vit.

Nou tou nou pou ale

Nou tou nou pou ale,

Nou oule kouman nou pale.

Kan dernien laklos sonnin,

Sakenn bizin rant dan trin.

Nou viv enn sel fwa,

Alor otan viv dan lazwa.

Laenn, zalouzi, lipokrizi anou brile,

Pou swazir lamour, lasazes ek linite.

Lavi li bien sinp,

Pou konpran sa pa bizin mont lor Mon Olinp.

Bann reg bien presi,

seki enan volonte pou reisi.

To rekolte seki to sinmin,

Leboner se to desizion, tomem met to destin.

Bizin touzour avanse ek persevere,

La reisit touzour enn kestion volonte.

Nou tou, nou pou ale,

Sak minit lavi presie.

Lavi li amer parfwa,

Alor otan viv ek lafwa.

Lavi se enn gran liniversite,

Profeser laverite, diplom laliberte. 

Li vo plis ki lor,

Malerezman enan gat zot trezor.

Lavi li enn gran mister, 

Avanse fodre zamin nou per.

Dernien son pou fer nou vibre,

To ou tar nou tou pou ale! 

Laverite kas tou lasenn

Laverite kas tou lasenn,

Laverite balye tou partikil laenn.

Li fer lalimier lor seki pep ase,

Kon enan lanprizonnman li amenn laliberte.

Bann inpi inn dir : « Anou anferm li ,

Parski li anpes nou fer seki nou anvi» .

Zot pe vini pou andoktrinin,

Ek pran kontrol lor nou destin.

Sa bann bandi anvi ansenn laverite,

Afin ki seki zot fer personn pa trouve.

Avek larzan sal zot aste konsians,

Ek fer tou pou enan enn kiltir silans.

Kantmem laverite rest for,

Wi pli for ankor ek ankor.

Leteneb pa kapav kasiet enn ti lalanp,

Parey laverite fer mansonz gagn kranp.

Laverite rann dimounn lib,

Ek li fer tou kitsoz vinn posib.

Limem semin lalimier,

Dan lamour li fer nou viv leboner.

Bann orgeye tranble kan tann li,

Zot per tansion li met zot touni.

Seki oz koze zot rod eliminin,

Zis parski sa pou met zot dan petrin.

Laverite pli for ki palab destriktif,

Ek so pwisans li touzour bien aktif.

Li vinn liber nou de tou lapenn,

Laverite kot yete li kas tou lasenn.

Parol vivan

Parol vivan,

Parol intelizan.

Lang ki dou ek sikre,

Langaz lamour ek lakorite.

Parol lasazes,

Ki ranpli ek rises.

Pwi savwar,

Ki permet nou fer memwar.

Parol ki sorti dan leker,

Ek fer vibre bann temwin sinser.

Melodi ki bers lespri,

Ek ki tini lavi.

Parol sorti dan labous,

Fer lev toulede to pous.

Parol ki dou,

Parol ki pa mou.

Parol ki bien zoli,

Mo vivan ki donn lavi.

Li amenn la verite ek laliberte,

Fer zonm fanm leve.

Parol ki fleri,

Reflet seki bon ek zoli.

So mizikalite fer anvi danse,

Sa parol ki fer reve.

Parol kouman laglas,

To get twa ek klas.

Parol intelizan,

Parol ki vivan.

Parol lamor

Parol lamor,

Ranpli ek remor.

Langaz maloker,

Ki fer fier.

Parol destrikter,

Pli mal ki pir.

Parol santi pi,

Ki touf lavi.

Parol margoz,

Ki fer gagn overdoz.

Li fer disan kaye,

Li amenn maler.

Parol ki koupan,

Ek doub transan.

Fann leker an kat,

Met twa kat pat.

Parol ki fos,

Ki donn twa bos.

Langaz ki fer tom a zenou,

Ek ki de move gou.

Parol ki fer dimal,

Ek prozet lavi bakanal.

Mansonz ki ser ou kwin,

Li fer plis dimal ki koudpwin.

Parol martin,

Ki fer dimal dan zwin.

Parol san rebor,

Sa se parol lamor.

Yerswar mo inn dans avek lamor

Kan soley inn al kouse 

Yerswar mo inn dans avek lamor,

Li’nn rod dirize me mo inn kraz so kor.

Enn lamizik satanik ti pe sem zizani,

Me mo pa inn les li anvair mo lespri.

Partou se teneb ki ti pe renien,

Oken plas pa ti enan enn bon semin.

Misie la inn livre a barbari mo bann sans,

Pou ki la kapav detrir tou partikil linonsans.

Mo ti konpletman koupe ek realite,

Laba pa ti enan okenn tras divinite.

Kote pli nwar dan mwan ti fer sirfas,

Seki ti kapav sov mwan se Bondie ek so lagras.

Wi senier Zezi, sap mwan dan sa lak-la,

Sef bann demon ti pe dans sega.

Senier ranforsi mo lafwa pa les mwan tonbe,

Dan nwarte kot mo ti ete, enn lalimier ti eklere.

Yerswar mo inn dans avek lamor,

Satan limem pe rod touy mo zefor.

Li abiz lor mo febles pou mo tonbe,

Mem rod detrir trezor mo lasante.

Pou fer mwan tonbe may mwan enn zanbek,

Seki li ti pe swete seki mo mor sek.

Mo ti anvi kriye me mo lavwa pa sorti,

Tou parol bloke mo pa pe koz manti.

Mo lekor ki tanp lespri sin, li’nn rod sakaz li,

Rod deray mwan, anpes mwan swazir lavi.

Mo reveye e mo pirifie tabernak,

Mersi Bondie to inn sap mwan dan so lak.

Aster mo kapav dir mo enn zonm lib,

Kan enan volonte narnien pa inposib.

Prezans mo sover ti mo sel rekonfor,

Yeswar mo inn dans avek lamor. 

Difisil pou konpran!

Difisil pou konpran,

Me ek tou mo bon santiman.

Koman nou fer otan lemal nou bann frer,

Ek ant nou enan otan lager.

Kan li fer seki pabon zot koze,

Kan li fer seki bon la ousi kritike.

Devan twa koze riye,

Deryer to ledo zot tir to manze.

Lor gran dra blan zot trouv zis ti nwar,

Bon kote kot twa sa ousi zot pran pou aswar.

Lizie fini vwale ek lorgey,

Kot twa kouman dir to inn sor lot pey.

Kan to oule avanse zot met baton dan to larou,

Koumandir to bon volonte pa a zot gou.

Dan tou tikwin zot pe maniganse,

Ek zot dir ki to pe tro declare.

Frer ek frer viv kouman lennmi,

Pou enn narnien ditou gat zami.

Tou relasion gate akoz bagaz,

Pou gagn plis zot pe fer paryaz.

Zot inn pas met dan fer sanblan,

Ek zot zis leker ki blan.

Bizin gard lespwar, krwar zot pou sanze,

Mem si pou linstan zot inn pran enn semin danzere.

Aret viv Kain, fer kouman Abel,

Deor lavi li sinp ek reel.

Zordi tro bokou move plan,

Ek tousala difisil pou konpran.

Kifer?

Kifer lor later nou rest lor nou swaf lape,

Pourtan dir enan gran gran progre.

Kifer isiba enan otan soufrans,

Alors ki pe fer bokou pou konbat laviolans.

Kifer avek otan mwayin kominikasion dialog manke,

Get dan mem lakaz, sakenn pas so kote.

Kifer ant nou enan otan baryer ek divizion,

Deplizanpli bann gran mir pe ranplas ban pon.

Kifer otan lapli tonbe me laswaf fer otan viktim,

Nou tou zanfan mem Papa, me enan nou ziz ilezitim.

Kifer enan ase delo pou nou tou depo lorizinn,

Me partaz inegal, enan toulezour sanz delo dan pisinn.

Kifer lor later enan otan zanfan malere,

Pourtan zot pa demann bokou, zis ki zot rev realize.

Kifer enan lavwa pli tande ki lezot,

Donn tou mem loportinite, seki mizer li pa zot fot.

Kifer nou tou respir mem ler,

Me nou pa reisi viv an frer.

Kifer partou enan otan linzistis,

Eski lazistis li zis a la porte bann ris.

Kifer zot pa swazir lamour,

Zot lorgey fer zot fer toutsort detour.

Kifer enan enn losean ant saler pov ek ris,

Sertin zot osi gourmand, zot lisien ki rasazie ek seki an plis.

Kifer otan lelou degiz an mouton,

Zot la pou satisfer zot lapeti apre zot foulekan.

Kifer zoli parol me zero aksion,

Eski se pa sak tizes ki amen gran sanzman.

Kifer nou koz plis ki nou ekoute,

Alors ki nou enan, labous enn ek zorey de.

Kifer palab kre otan divizion,

Ek li osi difisil diriz nou lemosion.

Kifer penan repons pou bann sinp kestion,

Alors ki enan otan ki degiz savan.

Kifer bann dimounn zot fer touletan mem erer,

Eski nou memwar kourt ou nou bien tro fier ?

Kifer otan dimounn tourn ledo ek laverite,

Alors ki limem simin ki men ver laliberte.

Kifer bokou dimounn prefer viv dan mansonz,

Alors ki lavi enan enn sel ek penan ralonz.

Kifer lamor pa get figir,

Me enan krwar zot pli siperyer.

Kifer nou refiz pou viv ere,

Alor ki samem nou vre destine.

Kifer nou atase avek seki nou enan,

E nou bliye seki nou ete.

Kifer nou egois ek  nou bann talan,

Kan nou konnin tou seki inn vini bizin ale.

Kifer nou refiz lasazes,

Kan se limem ki vre rises.

Kifer mo dir kifer,

Kifer, kifer, kifer?