Enn zour dan enn leker arid laenn inn pran nesans
Li ti telman etranz ki tou dimounn ti trouv li kokas
Laenn alor ti sezi sa lokazion kouman enn zoli sans
Tiginn tiginn li’nn aprann ek konpran so profi so latas
Rize kouman li ti ete, li’nn koumans par atak seki esansiel
Ant fanm ek zonm, san tarde li’nn kre enn kakafoni
La kot ti enan lamour laenn inn zet enn lavalas fiel
Zonm ek fanm apre so pasaz inn krwar ki zot bann lennmi
Divize fanm zonm inn koumans fer tou pou detrir enn lot
Toulede azir koumadir se lot-la ki responsab tou fot
De fas enn mem limanite konbat pou ki lot-la nepli ekziste
Rezilta sa lalit san mizerikord seki mem lanatir li an danze
Apre sa laenn inn senm zizani kot yer ti enan fraternite
Posede par so foli imin zet li lor so frer so ser ek vorasite
Olie rekonet kontribision inik sakenn, lot vinn enn menas
Fizi lor zepol, kouto dan lamin, pwazon dan leker, zonm lasas
So prwa se pa enn lot kreatir me so frer, so fanm ou mem so zanfan
Sa kanibal trouv so plezir kan laser so prosin brwaye anba so ledan
Partou kot gete lor anba lesiel, nou planet enn simitier ek bann tonm ouver
Nou krwar ki pou ekziste nou bizin fer nou prop zans plore ek soufer
Imin, kouman eski to inn kapav arive les laenn tourn twa an bourik
Eski to pa inn rann twa kont ki pou nou tou isiba enan ase boner
Akoz to linbesilite ek to laswaf pouvwar nou planet dan enn leta kritik
Kisennla inn don twa rol pou rase, ranverse, detrir ek demolir lor so later
Imin eski to pa panse ki to vokasion se avan tou lamour
Revey twa mo fer, mo ser avan ler sonnin pou lafin to parkour
Pli nou les nou konsimin ek pli nou pou koz bokou lapenn
Kan li get tou sa li frot so lamin, salive ek riye laenn
Lorizin sa zimaz-la: Patrick Hendry, Unsplash
