Tou inn koumanse par enn labondans promes
Lamour ti pran
so langazman avek lasazes
Petar ti sonin
partou ti enan gro gro fet
Lepasan ti gete
tonnin ek paret tonm dan bet
Bann premien zour ti bwar elixir plezir efemer
Toulezour lizie ti ouver ek enn ekstra bon limer
Bann mo dou ti koul a flo kouman dile ek dimiel
Delwin pa ti trouv mem lapousier enn gout fiel
Rize kouman li
ti ete liniorans inn fer so laparision
Partou kot li inn pase, li inn senm enn gran
konfizion
De amoure yer nespes inn bliye net zot bann santiman
Zot desizion pou di-re tonm karte dan gro touf pikan
Enn ti zafer ki zis enn detay pran lanpler liniver
Lespas ki ti pezib detournin ek vinn enn lanfer
Bann mo lepeser pwazon lanse kouman kouto
Douler-la ousi terib ki kout fwet ki fwiy enn ledo
Enn zoli relasion viktim legoism ek lorgey
Lamin invizib inn arive fer nou trouv tey
Li pe ris nou anba ziskan ki nou tou, nou derape
Kisennla pou kapav azir kouman nou file sekirite
Bann dokter san soulye ape fer nou vinn fou
Lafoul an delir galoup deryer sa bann fos gourou
Devan nou lizie pretann fer mirak deryer bal deroule
Dan zot sato bwar manze ziskan zot pans deborde
Parski nou enn sel fami, nou pe viv sa mem vertiz
Limanite pe tranble kouman enn rozo dan labriz
Si nou trap narnien nou pou sonbre dan sa trou nwar
Zis enn vre lamour kapav fer nou regagn gou lespwar
