Parol lamor

Parol lamor,

Ranpli ek remor.

Langaz maloker,

Ki fer fier.

Parol destrikter,

Pli mal ki pir.

Parol santi pi,

Ki touf lavi.

Parol margoz,

Ki fer gagn overdoz.

Li fer disan kaye,

Li amenn maler.

Parol ki koupan,

Ek doub transan.

Fann leker an kat,

Met twa kat pat.

Parol ki fos,

Ki donn twa bos.

Langaz ki fer tom a zenou,

Ek ki de move gou.

Parol ki fer dimal,

Ek prozet lavi bakanal.

Mansonz ki ser ou kwin,

Li fer plis dimal ki koudpwin.

Parol martin,

Ki fer dimal dan zwin.

Parol san rebor,

Sa se parol lamor.

Yerswar mo inn dans avek lamor

Kan soley inn al kouse 

Yerswar mo inn dans avek lamor,

Li’nn rod dirize me mo inn kraz so kor.

Enn lamizik satanik ti pe sem zizani,

Me mo pa inn les li anvair mo lespri.

Partou se teneb ki ti pe renien,

Oken plas pa ti enan enn bon semin.

Misie la inn livre a barbari mo bann sans,

Pou ki la kapav detrir tou partikil linonsans.

Mo ti konpletman koupe ek realite,

Laba pa ti enan okenn tras divinite.

Kote pli nwar dan mwan ti fer sirfas,

Seki ti kapav sov mwan se Bondie ek so lagras.

Wi senier Zezi, sap mwan dan sa lak-la,

Sef bann demon ti pe dans sega.

Senier ranforsi mo lafwa pa les mwan tonbe,

Dan nwarte kot mo ti ete, enn lalimier ti eklere.

Yerswar mo inn dans avek lamor,

Satan limem pe rod touy mo zefor.

Li abiz lor mo febles pou mo tonbe,

Mem rod detrir trezor mo lasante.

Pou fer mwan tonbe may mwan enn zanbek,

Seki li ti pe swete seki mo mor sek.

Mo ti anvi kriye me mo lavwa pa sorti,

Tou parol bloke mo pa pe koz manti.

Mo lekor ki tanp lespri sin, li’nn rod sakaz li,

Rod deray mwan, anpes mwan swazir lavi.

Mo reveye e mo pirifie tabernak,

Mersi Bondie to inn sap mwan dan so lak.

Aster mo kapav dir mo enn zonm lib,

Kan enan volonte narnien pa inposib.

Prezans mo sover ti mo sel rekonfor,

Yeswar mo inn dans avek lamor. 

Difisil pou konpran!

Difisil pou konpran,

Me ek tou mo bon santiman.

Koman nou fer otan lemal nou bann frer,

Ek ant nou enan otan lager.

Kan li fer seki pabon zot koze,

Kan li fer seki bon la ousi kritike.

Devan twa koze riye,

Deryer to ledo zot tir to manze.

Lor gran dra blan zot trouv zis ti nwar,

Bon kote kot twa sa ousi zot pran pou aswar.

Lizie fini vwale ek lorgey,

Kot twa kouman dir to inn sor lot pey.

Kan to oule avanse zot met baton dan to larou,

Koumandir to bon volonte pa a zot gou.

Dan tou tikwin zot pe maniganse,

Ek zot dir ki to pe tro declare.

Frer ek frer viv kouman lennmi,

Pou enn narnien ditou gat zami.

Tou relasion gate akoz bagaz,

Pou gagn plis zot pe fer paryaz.

Zot inn pas met dan fer sanblan,

Ek zot zis leker ki blan.

Bizin gard lespwar, krwar zot pou sanze,

Mem si pou linstan zot inn pran enn semin danzere.

Aret viv Kain, fer kouman Abel,

Deor lavi li sinp ek reel.

Zordi tro bokou move plan,

Ek tousala difisil pou konpran.

Kifer?

Kifer lor later nou rest lor nou swaf lape,

Pourtan dir enan gran gran progre.

Kifer isiba enan otan soufrans,

Alors ki pe fer bokou pou konbat laviolans.

Kifer avek otan mwayin kominikasion dialog manke,

Get dan mem lakaz, sakenn pas so kote.

Kifer ant nou enan otan baryer ek divizion,

Deplizanpli bann gran mir pe ranplas ban pon.

Kifer otan lapli tonbe me laswaf fer otan viktim,

Nou tou zanfan mem Papa, me enan nou ziz ilezitim.

Kifer enan ase delo pou nou tou depo lorizinn,

Me partaz inegal, enan toulezour sanz delo dan pisinn.

Kifer lor later enan otan zanfan malere,

Pourtan zot pa demann bokou, zis ki zot rev realize.

Kifer enan lavwa pli tande ki lezot,

Donn tou mem loportinite, seki mizer li pa zot fot.

Kifer nou tou respir mem ler,

Me nou pa reisi viv an frer.

Kifer partou enan otan linzistis,

Eski lazistis li zis a la porte bann ris.

Kifer zot pa swazir lamour,

Zot lorgey fer zot fer toutsort detour.

Kifer enan enn losean ant saler pov ek ris,

Sertin zot osi gourmand, zot lisien ki rasazie ek seki an plis.

Kifer otan lelou degiz an mouton,

Zot la pou satisfer zot lapeti apre zot foulekan.

Kifer zoli parol me zero aksion,

Eski se pa sak tizes ki amen gran sanzman.

Kifer nou koz plis ki nou ekoute,

Alors ki nou enan, labous enn ek zorey de.

Kifer palab kre otan divizion,

Ek li osi difisil diriz nou lemosion.

Kifer penan repons pou bann sinp kestion,

Alors ki enan otan ki degiz savan.

Kifer bann dimounn zot fer touletan mem erer,

Eski nou memwar kourt ou nou bien tro fier ?

Kifer otan dimounn tourn ledo ek laverite,

Alors ki limem simin ki men ver laliberte.

Kifer bokou dimounn prefer viv dan mansonz,

Alors ki lavi enan enn sel ek penan ralonz.

Kifer lamor pa get figir,

Me enan krwar zot pli siperyer.

Kifer nou refiz pou viv ere,

Alor ki samem nou vre destine.

Kifer nou atase avek seki nou enan,

E nou bliye seki nou ete.

Kifer nou egois ek  nou bann talan,

Kan nou konnin tou seki inn vini bizin ale.

Kifer nou refiz lasazes,

Kan se limem ki vre rises.

Kifer mo dir kifer,

Kifer, kifer, kifer?

Renion Leramiske

Renion leramiske,

Deroul dan sekre.

Zot zwenn dan marenwar,

Kan tou dimounn dormi aswar.

Zot met latet ansanm,

Pou planifie zot bann magouy.

Pa gagn letan met laganm,

Pe pans pou larg zis ou depouy.

Dan so zoli linz misie-la smart,

Koste gete ou pou etonin part.

Me pa al tro pre, laparans tronper,

Parski avek zot zis loder piyanter.

Zot plan se abiz lor lezot,

Tou lakaniot al dan zot pos.

Mark zot teritwar par zot move loder,

Dan ou prop lakaz pa kapav respir ler pir.

Sak fwa zot zwenn plan se destriksion,

Pou zot rinnien zot kre divizion.

Parfwa avegle par zot gran lapeti zot kole,

Galoup isi galoup parla, apre sa tase.

Sirtou pa ekout zot diskour,

Parol pa match ek askion.

Zot sel vizion kontrol mem ou lakour,

Avan zot anrasinin pran prekosion.

Touleswar zot zwenn,

Plan se sem laenn.

Zot koze riye ek maniganse,

Dan zot renion leramiske.

Moustik

Kan li sorti touletan li bien abiye,

Dan so zoli kostim gete kouman li serye.

San demande li pa hezite pou rantre,

E li ena toupe pa donn ou letan koze.

Kan li komanse zoli melodi,

Ou pou krwar ki li bien zanti.

Li fer tou pou gagn ou latansion,

Pa donn ou letan fer tann ou lopinion.

Vit ou rant dan so rol e ou komans aplodi,

Enn ti moman ou konpran ki li enn gran bandi.

Dan ou lakaz limem vinn lerwa, li enn vre pirat,

Ou ale mem lao anba a gos, a drwat.

Touletan avek li se bann gran diskour,

Li fer ou vinn lokater dan ou prop lakour.

Li ale mem koze ziskan ou dormi,

Lerla ou pou konn so gran lapeti.

Li bien gourman, zamin li ase,

Li pa viv dan sinplisite, pa konin kete limilite.

Enn ta koze li rakonte pou fer krwar ou enn gran ero,

Me si ou pas les li anbet ou pou trouve limem enan tou defo.

Zamin li pou rekonet ou valer,

Li bien konn amenn so rol akter.

Pou li ou zis enn moyen pou satisfer so lintere,

Li pa ezite pou kontaminn ou avek tou sort malpropte.

Fer atansion pa get zis so bataz,

Parski apre li pa pou onte pou fer santaz.

Avan ki li vinn kot ou pran ou prekosion,

Pou li pa zwe avek ou liberte swazir prevansion.