Prose ti malere

Mo dan box akize,

Pe ziz mwan pou mo stipidite.

Tou lizie sorti lor mwan,

Enan fini kondann mwan avan zizman.

Mo pled koupab « Votre honneur ! »,

Mo inn tro rod amenn rol akter.

Pardon pou tou tor ki mo inn fer,

Mo demann exkiz pou mo sal karakter.

Vremem mo inn mal azir,

Pa ti panse ki mo pe zwe ek mo lavenir.

Par mo latet dir mo ti kapav inn trouv lamor,

E mo ti pou les bann seki kontan mwan ek bokou remor.

Mo ti krwar ki mo kapav fer tou,

E ki bann seki ti pe donn mwan konsey ti zalou.

Votre majesté, votre honneur, mo akiz momem,

Mo sir ki mo pa kapav refas tou bann problem.

Mo inn tase, mersi mo lizie inn ouver,

Ouver ek trouve ki enan bokou dimounn ki soufer.

E seki dan soufrans se zis bann ti malere,

Se zotmem ki pey tou fre lepokase.

Sa mo krwar se enn reg lavi,

Seki gro ek gran toultan abiz lor seki tipi.

Lalwa-la ki koumsa, zot dir mwan,

E lalwa fer pou bann tipti par seki pwisan.

Lao dan box mo trouv la realite,

Seki pe zize zotmem enan tou pese.

Mo sir mo pou kontan pa konn lalwa,

Seki  kapav sap mwan se riz enn avoka.

Avan mo rant dan lakour  sef akizasion marnin,

Lagazet-sifon-ble fini dir ki mo pe kondanin.

Mo rant dan prizon regar sosiete me mo gard dinite,

Mwan mo konnin ki vedir lonete.

Koman Mandela mo rant dan liniversite,

Mo pou temwanien kouman mo ete.

Personn pa pou kapav ferm laverite dan kat mir,

So parfin liber mwan pou mo konbat lavi dir.

Dir mwan liniorans pavedir linosans,

Kondan mwan avan donn mwan mo sans.

Mo krwar zis seki frike ki enan drwa,

Zot kapav peye pou kas lalwa.

Ki pou fer mem mo grandimounn ti dan pins!

Zordi mo dan lak e mo sans pou sape bien mins.

Telman ramas beze mo disan inn vinn lefwa,

Ek tigit mo enan mo viv koman lerwa.

Se pa mo sitiasion ki touy mwan vitess pa kropa,

Se plito regar dimounn ki sorti kouman bann vie kamera.

Mwan mo enn zanfan ki konn valer so liberte,

Antretan mo trouv perpetielman dan box akize.

Bann voler rev

Bann voler rev,

Zot kouman koulev.

Zot disan li plis ki glase,

Leker inn aret bater.

Laflam brile dan to leker,

Dir twa aret reve, revey twa.

Me twa to enn fonser,

To konnin ki dan to lide twa.

Ti zeness latet plin rev, full avek lanbision,

Konper, komer dir twa to pe viv dan lizion.

Avek twa koze, riye fer fars; ler gete zot zalou,

Deryer to ledo pe fann nouvel ki to fou.

Twa to pe etal to bann lide fran fran,

Misie dir twa “pa posib sa”, e li vol to plan.

Vir vir twa , fer linstin rod tir to ti lipou poul,

Apre vinn dir zot proze sa devan lafoul.

Tou seki to dir pa pran o serye,

Parski pou zot to tro tipti.

Zenes pa les twa anbete,

Avanse ek donn sans to lavi.

Akoz to viv sinp abiz lor twa,

Tou seki zot fer, se pou sanz twa.

Pe rod met bann fos lide ek zot fos prediksion,

Dousman dousman zot pe fer zot bann inzeksion.

Zot fouy zot trou, zot mem pou tonm ladan,

Enn apre lot zot pou konnien sa bann gran degradan.

Zot enan to vis, zot sournwa ek zot lazanda sekre,

Me twa pa per, to kreater pou protez twa de tou danze.

Zot for lor parol me pa kon viv kouman dezarter,

Zot pran twa pou naiv, zot zis enn bann dezarte.

Kras lor ros, avan to lakras sek zot mas pou inn tonbe,

Zot aksion koz pli for ki zot bann zoli zoli koze.

Monwar aster to inn konnin fer twa atansion,

Pa ziz zwazo par so plimaz me par so aksion.

Zot disan reste fre kouman bann koulev,

Touzour zot pou fer to letour sa bann voler rev.

To'nn vinn manman sez-an

To’nn vinn manman sez-an,

To ti bizin enan bokou kran.

Me Selman to pa tipe atann,

Li la, enn ti labrez anba lasann.

Ti boug vini avek so bann zoli promes,

Koman enn ti laflam li alim to lames.

To leker ti pran dife kan li la,

Zot inn viv ansam gran lazwa.

Avek konfians to inn donn li tou,

To lamour, to letan ek to lekor.

Parfwa to ti riye kan li zalou,

E to trouv zot ansam ziskan lamor.

Enn zour to’nn santi dan to lekor enn prezans,

E to ti erez to ti mem fer enn de pa enn dans.

San atann to pran to portab e sonn to kopin,

To ti krwar li pou partaz to lazwa, rant dan to trin.

Li ti dir twa vinn zwenn li dan enn ti baz,

To ti panse ki li pou anons twa zot maryaz.

Li’nn dir twa ki ankor tro boner, bizin avorte,

Enn sel kou to lavi ti nek baskile.

Me twa to pa ti dakor donn li lamor,

Kifer otan soufrans dan to sor?

Li enn kapon pran to lekor kouman enn zwe,

Li’nn vol to bann rev pou satisfer so lintere.

Pa ti enan okenn swa apart separe,

Parski li tile to swazir ant zot de.

E twa avek kouraz to’nn desid pou donn lavi,

Afront to lantouraz pou twa ek pou li.

Finalman tou inn aksepte li pe vini,

Avek perseverans to’nn transmet lavi.

Lor to vizaz ti enan enn gran sourir,

Kan pou premien fwa to trouv so ti figir.

Get kouman li resanble so papa!

Li’nn ale se twa ki pou pran so rol-la.

Zordi li fer lazwa to fami, li enan sink-an,

E to pa bliye avek kouraz to’nn vinn manman sez-an.

Li napa fami sa mesie

« Li napa fami sa mesie,

Dan klas limem toultan dernie. 

Li reste dan shelter,

Li enn gran kretin. »

Li pa inn swazir so sitiasion,

Dan so latet enan bokou konfision.

So plezir se badinin riye,

So pli gran pastan se zwe.

Parfwa dan klas, li nek mazinin,

Lerla mis kriye, fer li onte.

Li pas pou enn inbesil parmi bann malin,

Tipti pe atann kan li pou gran pou li libere.

Parfwa li asize li nek reve,

Me seki li pli kontan se zwe boul amize.

Defwa kamarad sikann li, li vinn agresif,

Li defann li, e zot dir li bien negatif.

So manman ek so papa inn ale,

Granmer inn okip li, apre in large.

Zour bannla, ti pran li, li ti gele,

Pa ti mem konin kot li pe ale.

Dan loto li ti krwar li pe al dan prizon,

Ti sagrin pou kit tou sou bann kamarad.

Sa zanfan-la inn konn boukou tourbiyon,

Devan so lizie soular, prostitie inn fer parad.

Li’nn deza al dormi vant vid,

Kan koze, zot dir li stipid.

Ti gagn bate pou enn narnien ditou,

Tou so ti pansion ti pe al dan trou.

Li fer tou pou atir latansion,

Me parfwa devan so aksion, se linkonpreansion.

Bann prezize ek letiket pe touf li,

Me li, yamize ek apresie so lavi.

So ti latet ranpli ek zoli zoli rev,

Li pa demann boukou, zis pou les li fer so prev.

Kouraz tipti enn zour to zetwal pou briye,

Devan difikilte pa bes lebra, avanse.

Pa-za-pa, li pe fer so simin,

Pou al ver so destin.

So rev se gagn enn fami,

Mem si zordi li napa fami.