Mersi Arlette Perrine-Bégué

Mersi Arlette Perrine-Bégué,
Pou seki to’nn fer e seki to ete.
Vremem Ros pou vinn bos,
Seki to dir laverite li napa fos.

Arlette to inn ouver enn semin,
To fer nou konpran ki nou destin.
Nou destin bizin pran li dan nou lamin,
Nou enan kapasite zordi pou nou al lwin.

To parkour li exanpler pou la zenes,
To pa inn vinn la pou fer fos promes.
Lintere nou pei pou twa limem priyorite,
E touzour to inn evre pou ki li avanse

Larout li long me to pa per to enan leker,
To konin liberte ek linite ki zot valer.
Parmi bann zean litaratir to’nn trouv to plas,
To bizin fier seki to ete kan to get twa dan laglas.

Arlette to enn lexanp pou bann zenn Rodrige,
Ek dan Repiblik Moris to inn resi fer enn perse.
Li pa etonan ki zordi apel twa : « la grande dame de Rodrigues »,
To pe grandi parmi nou gran ser kouman enn gran pie fig.

Gras a bokou zefor to inn ariv enn gran nivo,
E pou nou, to pou touzour enn gran ero.
Depi Port Louis ziska Port Mathurin,
To nom pou res grave dan nou destin komin.

Zordi to’nn trouv to plas parmi bann zetwal,
Ziskan lontan bann-la, pou koz twa dan tou lasal.
To lamour pou to pep ek to pei li san degre,
Difon nou leker nou dir mersi Arlette Perrine-Bégué.

+ Jean Rex Casimir
1 Desanm 2011

Kan mo ser pou vini

Kan mo ser pou vini,

Mo pou bizin kit isi.

Mo pe atann mo ler,

Mo pa resanti laper.

Nimport ki ler mo pre,

Ansam nou de pou ale.

Pou al ver leternite,

Laba mo pou viv ere.

Mo ser li bien trankil,

Li konin nou bien frazil.

Mo bien kontan mo ser,

Parski li so leker li kler.

Mo pou trouv mo lavi,

Devan mo lizie o ralanti.

Narnien mo pa pou amenin,

Kan mo pou lor sa simin.

Lor so lebra mo pou ale,

Pa za pa nou pou avanse.

Mwan mo pe konn viv lavi,

E mo pare kan mo ser pou vini.

+ Jean Rex Casimir

21 Novanm 2011

To'nn vinn manman sez-an

To'nn vinn manman sez-an,

To ti bizin enan bokou kran.

Me Selman to pa tipe atann,

Li la, enn ti labrez anba lasann.

Ti boug vini avek so bann zoli promes,

Koman enn ti laflam li alim to lames.

To leker ti pran dife kan li la,

Zot inn viv ansam bokou lazwa.

Avek konfians to inn donn li tou,

To lamour, to tandres ek to lekor.

Parfwa to ti riye kan li zalou,

E to trouv zot ansam ziska lamor.

Enn zour to’nn santi dan to lekor enn prezans,

E to ti erez to ti mem fer enn de pa enn dans.

San atann to pran to portab e sonn to kopin,

To ti krwar li pou partaz to lazwa, rant dan to trin.

Li ti dir twa vinn zwenn li dan enn ti baz,

To ti panse ki li pou anons twa zot maryaz.

Li’nn dir twa ki ankor tro boner, bizin avorte,

Enn sek kou to lavi ti nek baskile.

Me twa to pa ti dakor donn li lamor,

Kifer otan soufrans dan to sor?

Li enn kapon pran to lekor kouman enn zwe,

Li’nn vol to bann rev pou satisfer so lintere.

Pa ti enan okenn swa apart separe,

Parski li tile to swazir ant zot de.

E twa avek kouraz to’nn desid pou donn lavi,

Afront to lantouraz pou twa ek pou li.

Final tou inn aksepte li pe vini,

Avek perseverans to’nn transmet lavi.

Lor to vizaz ti enan enn gran sourir,

Kan pou premien fwa to trouv so ti figir.

Get kouman li resanble so papa!

Li’nn ale se twa ki pou pran so rol-la.

Zordi li fer lazwa to fami, li enan sink-an,

E to pa blie to’nn vinn manman sez-an.

+ Jean Rex Casimir

18 Novanm 2011

Lapriyer

La priyer se enn fas a fas avek Bondie,
Koze Senier mwan to serviter ekoute.
Mo la pou viv e ekzos to volonte,
Mo sir lor samem sime mo bizin marse.

Dan silans mo leker mo vini avek seki mo ete,
Tou mo lavi mo depoz devan to lipie.
Mo lizie dan to lizie trankil devan twa,
Mo vini avek mo soufrans, mo lapenn e mo lazwa.

Se kan mo met mwan azenou devan twa mo konpran mo valer,
To pran mwan dan to lebra, to lamour pou mwan ranpli mo leker.
To konn mwan papa, avan mo koze to fini konpran mwan.
Malgre mo febles mo bann defo to trouv sinserite mo santiman.

Lapriyer se nouritir ki donn nou lenerzi pou avanse,
Sak minit lapriyer sinser kouman delo pir kipe koule.
Lapriyer li pa zis koze me li plis ekout volonte Bondie,
Li permet nou grandi e dekouver dan nou lape.

Lapriyer se enn ker a ker avek nou kreater,
Rendez-vous ant de amoure ki paresir ek lizie zot leker.
Pou ki nou grandi priye sak zour li neseser,
Li enn gran lazwa kan nou prop lavi vinn enn lapriyer.

+ Jean Rex Casimir
15 Novanm 2011

Anou vinn bann batiser lape

Anou vinn bann batiser lape,
Nou sem linite partou kote.
Anou viv dan la fraternite,
Ansam nou pou kapav ere.

Lape li prezan dan nou,
Nou bizin sem li partou.
Pou nou partaz lape,
Ek noumem nou bizin anpe.

Kan nou frer tonbe nou relev li,
Kan li pe fane nou koriz li.
Seki fer nou ditor nou pardone,
E demann ekiz seki nou inn ofanse.

Personn pa inn ne kouman enn sin,
Me vinn sin li nou destin komin.
Renons fer dimal e swazir konversion,
Samem ki apel mars lor bon direksion.

Anou montre ki se lamour ki pli for,
Dimounn kipe plore nou donn rekonfor.
Kan enan lape nou tou nou pou ere,
Ansam anou vinn bann batiser lape.

+ Jean Rex Casimir
13 Novanm 2011

Lanfer li vremem existe

Lanfer li vremem existe,

Linn fer pou bann orgeye.

Li pa la pou fer gagn per,

Ni pou met nou ankoler.

Enan ki swazir simin mesanste,

Enan lezor ki swazir simin lape.

Bann zust pou gagn bon tretman,

E seki move pou regret zot santiman.

Ledan pou grinse e tou plou plore,

Pou anvi sape e leker pou enan regre.

Dan lanfer pou enan zis soufrans,

E boukou pou regret zot liniorans.

Me bann zouvrir lape zot pou ere,

Parski zot inn soufer ek gagn persekite.

Mem lusifer tranble kan li pans lanfer,

Se pou sa li sem dezord lor later.

Me seki anvi sove pankor tro tar,

Met de kote lorgey e aret vantar.

Tourn paz ek swazir pou sanze,

Parski lanfer li vremem existe.

+ Jean Rex Casimir

13 Novanm 2011

Kifer enan lemal

Kifer enan lemal lor later,

Kifer nou gagn dimal e soufer.

Larm koule dan lizie,

Leker desire e brize.

Parfwa bann lanvi domine,

Nou anvi tou seki nou trouve.

Negliz nou frer nou ser,

Al mem ziskan fer zot mizer.

Gran laflam tantasion brile,

Passion pa kapav kontrole.

Nou anpiet lor seki pa pou nou,

Anplis desa nou arive zalou.

Fer lezot sibir seki nou pa oule,

Ferm lizie fer sanblan pa trouve.

Lorgey parmi nou limem dirize,

Leker lour e lamin reste bloke.

Lemal li fri de nou move santiman,

Lespri dominer ek mantalite klan.

Parfwa lifer dimal, nou leker bien sal,

Se nou fos mantalite kifer enan lemal.

+ Jean Rex Casimir

9 Novanm 2011

Mo pa inn sanze

Mo pa inn sanze,

Ouver gran to lizie.

Mwan ti zanfan malere,

Mo ankor touzour kontan reve.

Aswar mo dormi lalimier alime,

E mo ankor kontan sante danse.

Mo plezir se marse ek obzerve,

Parmi bann gran zarb lafore.

Mo pa inn sanze,

Ouver gran to de lizie.

To regar pe tronp twa,

Ilizion pe fer lalwa.

Sanz to regar,

Mwan mo pa vantar.

Mo zis konn panse asterla,

Mo konpran lemond-la.

Mo pa in sanze,

Ouver gran to zoli lizie.

Mwan zanfan lamizer,

Monn fatige ankoler.

Mo pe viv sinp,

Enn lavi san krint.

Mo pe viv mo liberte,

E mo sir mo pa inn sanze.

+ Jean Rex Casimir

9 Novanm 2011

Satan

Satan

Satan li finn tonbe depi lesiel,

Li pe sem dezord lor later.

Linn kree enn lemond artifisiel,

So larout amenn direk ver lanfer.

Satan vini pou tant zom ek fam,

Li anbet zot, perdi zot e pran zot nam.

Me seki mars dan simin Bondie li proteze,

Mem si satan vini avek toutsort mesanste.

Enan mem kinn vinn bann zanfan satan,

Zot vener lemal ek enan move santiman.

Par bann pratik diabolik zot rod gagn tou,

Vers disan fer mazik kre divizion ant nou.

Satan diab lisifer bann nom pou lespri lemal,

Zoli later ki kreater donn nou pou li bien banal .

Me so zour li konte e lipe tranble kot li ete,

Parski li konin lalimier lavi pou trionfe.

Tou bann zanfan satan pou plore e ledan pou grinse,

E zot pou regrete zot in swazir pou renie laverite.

Tou bann kipa respekte lalwa sakre e bann komandman,

Zot pou kriye e brile dan dife e zot soufrans li pou lan.

Bann ki lor zot fron penan sign zanfan lape,

Zot pou gagn met deor depi Rwayom Bondie.

Seki marke avek sif lemal nepli pou enan kran,

Zot pou koule ek al dan lanfer avek zot met satan.

+Jean Rex Casimir

8 Novanm 2011

Lavi

Lavi se enn lapel pou viv leboner,

Grandi sak zour e dekouver bann mister.

Lavi se enn konba perpetiel,

Kot viv dan lape li natirel.

Lavi se enn gran kado,

Li vo plis ki loto, bato ek sato.

Enn letap apre lot nou avanse,

Dousman Dousman ver nou destine.

Lavi se enn ti lagrin ki tonm dan later,

En pie grandi e donn bann fler tou kouler.

Parfwa dan lavi enan zoli sirpriz,

E lezot fwa enan tanpet ek gro labriz.

Lavi se resevwar ek osi donin,

Li perdi so valer kan nou ferm lamin.

Seki noue nan bizin partaze,

E sa li pou permet nou viv ere.

Lavi se enn semin lor lekel nou marse,

Enan bann obstak me bizin persevere.

Nou pli gran trezor se lamour nou fami,

Resevwar e sem lamour se sa lavi.

+ Jean Rex Casimir

8 Novanm 2011

Mo extra fier mo enn Rodrige

Mo extra fier mo enn Rodrige,

Parski mo enn Rodrige zordi mo ere.

Tombe leve zame mo rekile,

Avek kouraz mo touzour avanse.

Mo extra fier mo enn Rodrige,

E ki mo konin kete solidarite.

Pou mo pep mo kapav don mo lavi,

Donn mo lavi pou ki nou viv ini.

Mo extra fier ki mo enn Rodrige,

Kot mo ete mo gard mo lidantite.

Mo pa onte pou dir mo Rodrige,

Parski pou mwan li enn fierte.

Avek nou kouraz nou gagn nou lavi,

E nou viv kouman enn sel fami.

Ek mo later mo vreman atase,

Mo extra fier ki mo enn Rodrige.

+Jean Rex Casimir

6 Novanm 2011

Mo pep mo kontan twa

Mo pep mo kontan twa,

Se gras a twa ki mo la.

Pep Rodrige, pep solider,

Pep ki konin kete boner.

To enan to kiltir prop a twa,

Ansam nou sante danse dan lazwa.

Pep ki viv sak zour enn gran sazes,

Devan travay nou pa kile, nou pa pares.

Partou dan lemond enan Rodrige,

E kot zot ale zot kiltir zot pa blie.

Souvenir zot later rest dan zot memwar,

Kouman enn labouzi li repous marenwar.

Mo pep devan to bote mo konn lemerveyman,

Dan mo leker mo viv enn bouyon santiman.

Lefe ki mo enn Rodrige ran mwan ere,

Dan mo lespri mo resanti enn gran lape.

Pep ki akeyir dimounn avek sourir,

To pe avanse ver enn gran lavenir.

Gras a twa mo enan lafwa,

E mo pep mo kontan twa.

+ Jean Rex Casimir

6 Novanm 2011

Rodrige ala to konn amize

Rodrige ala to konn amize,

Sega lakordeon pe rezone.

Diri may kari orit inn prepare,

Letour enn latab zoli dialog pe large.

Ansam dan linite nou sante danse,

Rasanble nou partaz lamitie.

Sakenn vini avek seki li ete,

Wi vini pou nou selebre.

Rodrige ala to konn amize,

Dan enn lanbians mari serye.

Nou tou ansam anou marye pike,

Kan nou la tou traka met de kote.

Lor laplaz kouman dan vilaz,

Kot enan pie ek zoli kokiyaz.

Manze bwar, sante ek danse,

Rodrige ala to konn amize.

+ Jean Rex Casimir

6 Novanm 2011

Seki to pe fer, fer li bien

Seki to pe fer, fer li bien,

Pa rod amenn rol malin.

Sak zour to bizin vinn meyer,

E azir avek tou to leker.

Tro souvan nou pans vit fer,

E nou negliz lide pou bien fer.

Bokou travay nou arive bakle,

Zis pou nou pa tro fatige.

Touletan nou prese pou fini,

Zis pou nou kapav evit sousi.

Nou fasil tonm dan paress,

Me meyer se swazir sazess.

Travay pou li enn zafer sakre,

E nou apele pou touletan exsele.

Fer li dan meyer fason ki posib,

San presion dan enn manier lib.

Afirm twa, devlop to personalite

Lavi travay permet twa devlope.

Wi! Tomem met to destin,

Seki to pe fer, fer li bien.

+ Jean Rex Casimir

2 Novanm 2011

Ere

Ere bann ki’nn swazir lapovrete dan zot leker,

Zot pe viv lor later enn gran boner.

Ere bann seki pe travay pou lape,

Zot pou gagn zot plas dan Rwayom Bondie.

Ere bann seki pe gagn kraze e pe plore,

Zot pou libere e zot pou konsole.

Ere bann ti dimounn ki marzinalize,

Zot pou gagn lazistis e zot pou soulaze.

Ere bann seki konpran zot prosin e enan pitie,

Zot pou gagn trete avek bokou sarite.

Ere bann seki zot leker kler ek sinser,

Zot pou trouv Bondie e viv dan lalimier.

Ere bann zouvrie kipe travay pou lape,

Zot pou enan tit zanfan Bondie.

Ere bann ki gagn kraze akoz zot viv laverite,

Dan Rwayom Bondie zot pou viv ere.

+ Jean Rex Casimir

1 Novanm 2011

Ladilter

Ladilter pe kree bokou dezord dan sosiete,

Dan langazman maryaz bokou pa viv fidelite.

Dir wi pou le meyer pou le pir avek foste,

Parol bien zoli me dan leker get zis lintere.

Enn panse malsin, enn regar malelve,

Apre sa enn aksion fer zis pou sansualite.

Ladilter samem pli gran pese,

Ki kapav komet lor later Bondie.

Misie koman madam zordi infidel,

Andeor Maryaz zot rod plezir sexuel.

Li normal pou zot manz banann dan debout,

Sanz direksion lor ronpwin ek al lor fos larout.

Seki pe viv fidel zot merit enn meday,

Parski zot respekte mem pli tipti detay.

Pilie enn relasion senn se respe, fidelite ek konfians,

Kan lorgey ki dirize reaksion seki pou enan defayans.

Zanfan nesans pa kone ki sannla papa,

Akoz enn bann dam san lafwa ek lalwa.

Bann move garson osi fer bokou dega,

Pou zot sem dan zardin vwazin se enn drwa.

Zordi ankor frwi defendu li ankor enn me prefere,

Zom kouman fam pe fasilman less zot tante.

Akoz zot mesanste ek gormandiz, zot tom dan lerer,

E partou kote enan bokou ki pe komet ladilter.

+ Jean Rex Casimir

31 Oktob 2011

La sexualite

La sexualite pou bokou li penan sekre,

Me eski zot vremem ki to ete?

Avan atenn laz adilt fini gagn relasion sexuel,

E seki interes zot se zis plezir sansuel.

La sexualite permet nou dir wi pou lavi,

Wi pou viv li e permet li touzour grandi.

Nou enan kapasite dan nou pou transmet lavi,

Nou apele pou epanwi dan enn fami.

Dan maryaz kouman kom selibater,

Nou apele pou viv enn sexualite sinser.

Enan purte dan nou leker kouman dan nou regar,

Viv enn sexualite responsab li enn sians ek enn lar.

La sexualite pa egal la sansualite,

Se plito viv nou langazman ek fidelite.

Gras a vertu chastete nou viv enn bon sexualite,

Nou apran metriz nou mem e viv dan laverite.

Ledikasion sexualite zordi li enn nesesite,

Sa li permet nou dekouver nou vre lidantite.

Sak dimounn merit viv enn sexualite ki responsab,

E sa permet enn bon devlopman ki vreman durab.

Enan per, lot bann sot brit ek enan bien epanwi,

Par nou sexualite nou apele pou transmit lavi.

Dan enn fason spiritiel, ekilibre ek bokou limanite,

Lasazess ek limilite permet nou viv enn bon sexualite.

+ Jean Rex Casimir

23 Oktob 2011