Mersi Arlette Perrine-Bégué,
Pou seki to’nn fer e seki to ete.
Vremem Ros pou vinn bos,
Seki to dir laverite li napa fos.
Arlette to inn ouver enn semin,
To fer nou konpran ki nou destin.
Nou destin bizin pran li dan nou lamin,
Nou enan kapasite zordi pou nou al lwin.
To parkour li exanpler pou la zenes,
To pa inn vinn la pou fer fos promes.
Lintere nou pei pou twa limem priyorite,
E touzour to inn evre pou ki li avanse
Larout li long me to pa per to enan leker,
To konin liberte ek linite ki zot valer.
Parmi bann zean litaratir to’nn trouv to plas,
To bizin fier seki to ete kan to get twa dan laglas.
Arlette to enn lexanp pou bann zenn Rodrige,
Ek dan Repiblik Moris to inn resi fer enn perse.
Li pa etonan ki zordi apel twa : « la grande dame de Rodrigues »,
To pe grandi parmi nou gran ser kouman enn gran pie fig.
Gras a bokou zefor to inn ariv enn gran nivo,
E pou nou, to pou touzour enn gran ero.
Depi Port Louis ziska Port Mathurin,
To nom pou res grave dan nou destin komin.
Zordi to’nn trouv to plas parmi bann zetwal,
Ziskan lontan bann-la, pou koz twa dan tou lasal.
To lamour pou to pep ek to pei li san degre,
Difon nou leker nou dir mersi Arlette Perrine-Bégué.
+ Jean Rex Casimir
1 Desanm 2011
2 comments:
c vremen n fierte pu truv bann dimune vremen compatriote et ki vremen ena sa lènvi pu fer pays ale de làvant la..mo fiere mo n rodriguais et mosi bien ki mo pena bku lìnfluence mo pu essaye apporte mo làide pouki nu zil li prospere..c bann dimune kuma zot ki fer mw vremen inspire..keep it up..si n zour mo arrive contribue pu n changemen positive dan rodrigue avk la grace 2 dieu..mo envi to conin c ki mone prend model lor zot bann frere ek soeur ki combate pu nu lìle
Mersi ellena pou sa zoli komanter. Sakenn selon so kapasite ansam nou pou resi fer nou zil avanse. larout-la, sir li long me ansam malgre enan bann makadam lor n ou larout, nou pou resi ariv ziskan bout. Mo krwar dan bann zenn kouman twa ek mo sir ki demin Rodrig li pou meyer.
Post a Comment