Mo filozofi

Mo filozofi

Lavi li enn konba e bizin touzour persevere, pa bes lebra,

li inportan ki nou pran kont nou zistwar pou nou kone kot nou pe ale.

Lavi se enn zwe avek bann reg bien preci ki nou tou bizin respekte.

Seki nou seme samem ki kou pou rekolte, nou bizin enan la sazes.

Fer pou lezot seki nou pe atann de zot,

Touzour esey nou met dan plas nouu prosin.

Kan maler tous ou prosin ou bizin konsol li,

Lerla kan ou dan problem ou sir ou pou gagn enn lasistans.

La verite ek konesans samem bizin nou priorite,

Zot neseser pou nou kapav amen sanzman dan sosiete.

Kan nou krwar ek persevere narnie pa imposib,

Dan tou sitiasion nou bizin fer diferans ant seki bon ek seki move.

Nou bizin fer nou travay avek enn leker sinser,

Kan nou enan pou koze nou bizin fran.

Si nou lespri an pe nou pou kapav viv dan larmoni,

Kan nou dirize par lorgey, lerla la mem la koripsion pou trionfe.

Pe inport nou listwar, personn pa kapav ziz nou,

Parski lor later penan personn ki parfe.

Selwi ki mars lor simin vre lalimier li pou resiviv la perfection.

Si nou dekouver dekouver ki nou été lerla nou pou kone ki direksion nou bizin pran.

Penan ti dimounn, se zis ki saken enan so kapasite ek so talan,

Nou tou nou mamb ennsel fami, nou bann fler mem bouke.

Kan nou tou nou aksepte viv simplisite ek limilite,

Lerla mo sir ki lor later pou enan lape.

+Jean Rex Casimir

17 septam 2011

Vantar

Vantar

To penan okenn lamour prop,

Seki to fer to trouv li bien top.

Dan kasiet to fer bann atak personel,

Eski dan plas to leker to enan enn gro fiel?

Nou ti panse ki to finn fini integre,

E ki ansam nou pou travay pou sem lape.

Me twa to penan okenn konpasion,

To pa fer zefor pou enan konpreansion.

To fer nou perdi nou letan,

Aster nou konpran ki to penan okenn kran.

Manier to azir li dan fos,

Dan plas to leker sirman to enan enn ros.

Par manier ki to azir, to met to prosin mal a lez,

E si to kontign koumsa enn zour to po tom anba enn falez.

Li pa ankor tro tar pou to sanze,

Inn ler pou to arete avek to move mantalite.

To bizin donn to lavi enn lot sans,

Lerla lezot pou kapav fer twa denouvo konfians.

Dan plas lemal swazir la verite,

Lerla to pou trouve ki nou pou vreman ere.

To bizin pa ranferm twa lor tomem

Al ver lezot e aret kre ennta problem.

Pa per pou trouv enn dimoun pou to koze,

Lerla to pou trouve to lavi li pou serie.

+ Jean Rex Casimir

16 septam 2011

Kan mwan pou vinn nou

Kan mwan pou vinn nou

Ki progre pou ena si to pans zis to tousel ?

Touletan pou twa se mwan, mwan ek ankor mwan.

Dan to latet to’nn kre enn lemond artifisiel,

Kot zis to tousel kapav enan santiman.

To pa konpran soufrans lezot,

Dan tou kitsoz to mem bizin a la kot.

Lager dan lemond sa pa konsern twa,

Dimoun mizer devan to laport, sa pa mem inflians twa.

Seki pase letour twa sa pa fer twa narnie,

Zis kan to lintere menase lerla ki to pou bouze.

To pale donn lamour mem enn ti plas dan to leker,

To pa hezite pou fer to prop fre ek ser soufer.

Kan to avek nou zoli koze nou tande,

Me par derier nou ledo to pe nek zis maniganse.

To pena enn sel visaz e depi lontan to lor fos larout,

Egois, ipokrit, kifer to manz banann par debout.

Kan mwan pu vinn nou lerla dan lemond pou enan lape,

Nou pou bien kontan si bann mo kouman mwan, momem, mo, dan diktioner nepli ekziste.

Lager, divizion, trahizon vinn akoz sertin pans zis zot mem,

Dimounn mor, soufer, marzinalize pou zot li mem pa enn blem.

Nou zanfan nouvo zenerasion, nou krwar dan enn lemond meyer,

Lamin dan lamin nou pou travay pou ki sakenn trouv so boner.

Nou pou travay pou linite e sakenn so talan pou valorize,

Sakenn selon so kapasite pou amenn so kontribision, pou ki lemond li kontign tourne.

Kan nou tou nou kapav pans an term ‘Nou’,

Lerla sa pou ve dir ki enn nouvo ler inn komanse.

Lerla anfin nou pou kone la liberte k iso gou,

Lor figir tou zanfan pou enan sourir ek nou tou nou pou ere.

+ Jean Rex Casimir

15 septam 2011

Soufrans enn pep

Lane ale enn lot vini to touzour reste anplas,

Dan to bann lekol enan touzour bann mem klas.

Enn de konstriksion inn enan me pa plis ki sa,

Simin kinn ranze li amen nou pa pli lwin ki la.

Seki nou gagnin nou depans plis ki sa,

To travay e to saler li pa ase pou to viv ere.

Nou santi ki nou gagn maltrete kouman enn bann lera,

Nou bann zanfan pe bizin al exzile.

Bann fami pe exploze, papa pe bizin kite ale,

Zanfan grandi san lafeksion ek manman tolezour plore.

Defwa se granper granmer ki bizin zwe rol papa manman.

E li pa fasil pou konpran zot santiman.

Kan ou anvi fer zefor me ou konin ki sa pa pou servi narnien,

Donn ou zis ase pou ou pa mor lorbor simin.

kan nou lavwa personn na pa le ekout li,

nou demann nou ki sans pou donn nou lavi.

Kan ou ale aste komision koumandi bizin amen larzan dan gro tant,

E seki ounn aste pas ase pou plin ou vant.

Pri fret bato ogmante preske toulezour,

Ou demann ou si nou merit zis soufer e mem pa inpe lamour.

Sertin parmi nou pou zot prop lintere inn prefer vinn konplis nou bann bouro,

E zot enan toupe fer nou krwar ki zot enn bann gran ero.

Dan lavenir kan bann genarasion relir zistwar nou pei,

Pa krwar zot pou satisfe ek bann misie la zot lavi.

La mizer pe fer ravaz partou e se bann fami kipe plis soufer,

O lie ed nou pou debout lor nou prop lipie bann la prefer met nou dan erer.

To soufrans pep ki nou kontan pa fasil,

De zour an zour to pe vinn de plizan pli fragil.

To soufrans penan mo pou rakonte,

Kan lesklavaz inn aboli twa zot inn trouve ki to pa merit liberte.

Ki fer nou, nou pa gagn drwa ere ?

Enan mem ki dir ni nou pa inn fer pou viv ere.

To langaz, to kiltir, to zistwar tou pa respekte,

E lepep santi ki so dignite pe bafoue.

Lepep mem avek tigid ki nou enan,

Nou pou reisi fer devlopman.

Ti pa nou pou avanse,

Ziskan zour ki nou kapav profit nou liberte.

Lerla to pou kapav vreman konin ki valer to dignite,

Pep kipe soufer me fer manier touletan gard to simplisite.

+Jean Rex Casimir

14 Septam 2011

Kreol Rodrige

Kreol Rodrige

Enn group zanfan pe asize anba enn pie bakwa,

Zot pe get dan direksion mem simin.

Dan zot leker enan enn gran lazwa,

E ansam zot dir ki touzour zot pou travay lamin dan lamin.

Langaz sa bann zanfan pe koze linn pran nesans dan zil Rodrig,

Li parey kouman enn ti lagrin ki pou donn enn gran pie fig.

Kiltir enn pep se samem ki permet li evolie,

Si nou les nou leritaz disparet, nou lavenir pou an danze.

Pep Rodrige bizin konbat pou ki so kiltir li respekte,

Langaz ki nou pe koze bizin sovgarde.

Mo zanset inn kre sa langaz pou ki zot kapav partaze,

Dan la soufrans, lapenn ek la zwa zot santiman zot pe exprime.

Kreol Rodrige zordi li la, me travay kinn fer pou valoriz li pa ase,

Tan ki lepep divize li pou difisil pou ki ansam nou avanse.

Nou bizin kapav pa ekout bann seki pe rod zis gouvernin,

Ranpli zot pos alor ki nou kiltir li pe rant dan petrin.

Kreol Rodrige li la e li demann evolie kouman enn lang,

E non pa selman kouman enn langaz pou koz koze malang.

Mo pou fier kan mo trouve enn diktioner ki port to nom,

E nou Rodrige parey kouman seselwa nou pou fer twa langaz ofisiel nou fitir nasion.

Lotonomi se en zouti ki nou pou servi pou nou donn twa plas ki to merite,

Avek seki nou enan nou pou travay pou ki to kontign develope.

Kan zanfan, zeness ek gran dimounn travay ansam to pou trouv to dignite,

Lepep Rodrige merit plis ki bann ti miet ki lipe gagne.

Nou langaz, Zanfan sagrin ki lepep Rodrige zamin inn panse ki to importan,

Zordi kan to pe pre pou disparet lerla ki zot dir ki to merit enn developman.

Generasion apre li pou difisil pardon erer ki nou pe fer zordi,

O lie travay ansam, sakenn pe rod so zis prop kredi.

Vinn ansam nou koze letour mem latab,

Lerla nou pou kapav konin ki sennla kon fer zis palab.

Zordi nou langaz pe demann evolie,

Demin nou pou servi li pa zis pou koze.

+Jean Rex Casimir

14 septam 2011

Langaz Kreol

Langaz Kreol

Depi avan mem ki nou vinn lor later,

Samem langaz nou enan dan nou leker.

Dan sa langaz nou paran ti koz ek nou zantiman,

Avek samem langaz nou exprim nou bann santiman .

Nou finn ne dan enn lanvironnman kot koz kreol,

E nou bien kontan ki nou langaz pe rant dan lekol.

Samem langaz ki permet nou viv linite dan diversite,

San kreol nou penan okenn lidantite.

San nou langaz kreol ki nou ete,

San nou langaz maternel kot nou pou ale.

Biento lekol, apre sa biro ek dan lavenir parlman,

Kifer enan pa dakor ki nou langaz touzour bizin met li delavan.

Nou langaz se enn trezor ki bizin valorize,

Zanfan nou pei merit ki nou respekte zot dignite.

Tou dimounn bizin merit gagn mem loportinite,

Zordi anfi bann barier pe komans tonbe.

Angle aprann an angle, Franse aprann an franse,

Zis nou tousel nou pa aksepte sa laveri.

Zanfan nou pei ousi merit enn meyer tretman,

Kan pa ou lavenir ki dan zwe, fasil ou vini avek tout sort largiman.

Pei larkansiel kifer lor to later enan otan divizion ?

Touletan bann egois rod fer aksepte zot lopinion san okenn diskision.

Zanfan lakot, lavil ek dan vilaz dir les nou langaz al pli lao,

Parski nou tou nou merit mem par gato.

+Jean Rex Casimir

14 septam 2011

MOUSTIK

Moustik

Kan li sorti touletan li bien abiye,

Dan so zoli kostim gete kouman li serie.

San demande li pa hezite pou rantre,

E li ena toupe pa donn ou letan koze.

Kan li komanse zoli melodi,

Ou pou krwar ki li bien zanti.

Li fer tou gagn ou latansion,

Pa donn ou letan fer tann ou lopinion.

Vit ou rant dan so rol e ou komans aplodi,

Enn ti moman ou konpran ki li enn gran bandi.

Dan ou lakaz limem vinn lerwa, li enn vre pirat,

Ou ale mem lao anba a gos, a drwat.

Touletan avek li se bann gran diskour,

Li fer ou vinn lokater dan ou prop lakour.

Li ale mem koze ziskan ou dormi,

Lerla ou po konn so gran lapeti.

Li bien gourman, zame li ase,

Li pa viv dan simplisite, pa konin kete limilite.

Enn ta koze li rakonte pou fer krwar ou enn gran ero,

Me si ou pas les li anbet ou pou trouve limem enan tou defo.

Zamin li pou rekonet ou valer,

Li bien konn amenn so rol akter.

Pou li ou zis enn moyen pou satisfer so lintere,

Li p ape pou kontaminn ou avek tou sort malpropte.

Fer atansion pa get zis so bataz,

Parski apre li pa pou honte pou fer santaz.

Avan ki li vinn kot ou pran ou prekosion,

Pou li pa zwe ek ou liberte soizir prevantion.

+ Jean Rex Casimir

13 septam 2011

Lamour

Lamour

Lamour, lamour ki ete lamour ,

Pou konpran pa bizin enn gran kour.

Kan nou resanti lamour nou enn lot kalite,

Kan lamour li la koumadir ou envi anvole.

Lamour pa fer prefans e li pran patians,

Dan lamour penan zalouzi e penan plas pou lignorans.

Kan lamour trap ou ou anvi viv fidel,

E ou nepli anvi viv tousel.

Lamour li dou, li merveye,

Kan nou amoure nou lintere met de kote.

San hesite nou kapav donn nou lavi.

E an retour pa bizin donn ou okenn garanti.

Penan narnien ki pli gran ki lamour,

Kan li la san papie ou kapav fer bann gran diskour.

Lamour li plis ki selman gagn plezir,

E se limem dan nou leker fer nou resanti bann pli gran dezir.

Pou lamour pa enan okenn barier,

Lamour mem fer nou depas nou laper.

Nou kapav viv san bwar delo e san manze,

Me enn segond san lamour li reprezant enn gran danze.

Lamour li permet nou transmet lavi,

E se samem premier santiman ki enn zanfi resanti.

San lamour nou pou viv dan marenwar,

Lamour inn permet bokou dimounn gard zot tras dan listwar.

San la verite, la konfians ek respe pa kapav enan lamour,

E si boukou zot leker inn desire sa parki zot pa inn konn viv sa zoli parkour.

Kan nou viv li nou dekouver ki vreman li plis ki enn santiman,

Lamour se santiman ki fer konpran kifer nou leker li ousi gran.

Lamour li fer nou depass nou bann limit,

E li fer nou dekouver ki leboner se samem pli gran reisit.

Si tou dimoun ti konpran kouman li zoli ki nou viv lamour,

Partou lavi ti pou kapav swiv so kour.

+Jean Rex Casimir

12 septam 2011.

Poem: Mo premie lamour

Mo premie lamour

Kan mo trouv twa mo leker bat san a ler, mo transpire,

Kan mo get twa dan to lizie mo santi tou mo rev kapav realize.

To mem ki donn sans mo lavi, san twa mo pa kapav avanse,

Mo bizin twa, san twa sir mo pou malere.

Mo rapel zour nou ti zwenn, soley ti pe briye,

Dan mo leker ti kouman dir inn alim enn dife.

Manier ki to ti azir, bann parol ki to ti dir,

Sa pou rest touzour grave dan mo souvenir.

Avan twa pa ti enan personn e mo pou touzour rest avek twa,

Mo promet twa fidelite ek sincerite, zame mo pa pou abandonn twa.

Mo bien apresie manier ek fason ki to viv,

San twa mo sir mo pa pou sirviv.

To mem mo premie lamour e tonn sanz mo lavi,

Depi zour mo’nn zwenn twa tomem devan mo lizie enan pli gran pri.

Kan mo’nn komans kontan twa to’nn ed mwa pou al ver lezot,

San twa dan mo lavi ti pou enan bokou fos not.

Mo anvi kit tou pou swiv twa,

E tou seki mo ena mo pa per pou donn twa.

Mo sir ki avek twa mo pa pou enan okenn regre,

E ant nou pa pou enan plas pou okenn sekre.

Kan mo avek twa narnie mo pa per,

To mem okip tou plas dan mo leker.

Avek twa mo’nn apran kontan,

E aster la mo kone ki lamour li bien puisan.

Dan mo zeness kouman dan mo vieyess mo pou viv avek twa,

E mo sir ki mem lamor pa ase for pou separ twa ek mwa.

Ki fer malgre mo bann defo to’nn soizir mwan ?

Me zordi mo sel rev se touzour resanti sa zoli santiman.

+Jean Rex Casimir

12 septam 2011