Poem en homaz Antoinette Prudence
Kan mo relire to zistwar mo dekouver ki to enn gran kado pou to pe.
Depi tipti tonn dekouver ki a traver langazman o servis lezot pou to kapav donn enn sans to lavi.
To inn grandi avek dan to leker lamour pou to prosin.
Touzour tonn viv an armoni avek to bann vwasin.
Antoinette kifer to finn kit nou boner koumsa?
Nou ti ankor enan bokou pou aprann de twa.
Zanfan Rodrig pou touzour rappel twa,
Parski pou zot to ti kouman enn manman.
To pa ti kontan pouvwar e to pa inn rod grander,
To inn viv dan simplicite e to inn ed boukou dekouver zot boner.
Touzour to inn soutenir bann fami,
To ti enn gran konseye pou to bann zami.
Lintere to pei ti pass avan tou lezot lintere,
Pou li grandi tonn voyaze pou al partaz nou simplicite.
Kompetans ki tonn akerir to pann inn gard li to inn partaze,
Tonn touzour donn lezot loportinite pou debriye.
Pandan tou to lavi to ti enn fam jwaye,
Parski to ti konin bizin affront difikilte san dekouraze.
To lavi Antoinette li enn zoli mesaz pou nou tou Rodrige,
Nou bizin antan ki enn pep solider e pran nou responsabilite.
Nou pa kapav dir ki nou kwrar dan Zezi Kri,
Si nou pa viv dan la verite e rann enn temwaniaz Levanzil par nou lavi.
Antoinette to nom ek to mesaz pou res grave dan listwar,
Parski dan enn gran ideal to gagn kouraz pou krwar.
Aster mo konpran kifer nou dir,
Ki bann premie fri ki tombe se bann seki inn mir.
Difon mo leker mo dire twa mersi,
E mo swete ki lavi sak Rodrige resanble to prop lavi.
+Jean Rex Casimir
Le 5 Septam 2011
No comments:
Post a Comment