Aswar kan to pe al dormi to lekor fermal to fatige.
Depi granmatin to’nn leve pou e to pa inn gagn enn letan pou to repose.
Kwi manze, lav linz, al travay e fer louvraz zame to dekouraze.
To pli gran lazwa se kan to trouv to fami avanse.
Dan to lavi to’nn fer boukou sakrifis.
To inn soufer e pa touzour to’nn gagn lazistis.
To’nn bizin kourbe, soumet e parfwa mem larm inn koule dan to lizie.
Kot to’nn gagn sa kouraz pou la pou to kontinie?
Fam tomem ena plis valer dan nou sosiete.
To enn trezor ki nou bizin touletan valorize.
Tonn fer pou vinn manman me parfwa dan lacaz to bizin met osi palto papa.
To bizin trase, vers to laswer lor later kouman dan lamer e seki ed twa pou avanse se to gran lafwa.
To donn donn to lavi pou to fami par amour,
Narien to pa atann an retour.
Me arrive ki parfwa to zanfan pa rekonesan,
Zot rezet twa, bris to leker parski zot kwrar zot tro gran.
Fam pou tou sa bann kin fer twa soufer akoz zot mank kompasion,
Mwa zanfan Rodriguais mo demann twa pardon.
Fam mo kone ki mo été, kot me pe sorti e kot mo pe ale.
Si zordi mo la se parski tonn bien kontribie.
Pou dir twa mersi, les mo rann twa homaz,
Se avek enn gran lazwa ki mo pe rann gras pou tou kouraz.
+Jean Rex Casimir
5 septam 2011
No comments:
Post a Comment