Mersi mam
Mam[1] se manier ki mo appel twa,
Mam se koumsa ki mo leker dir mwa dir twa.
Mo anvi dir twa mersi pou tou seki to finn fer pou mwa,
Mo anvi dir twa mersi pou seki to ete pou mwa.
Tou-le-tan to donn bann bon konsey,
To lavwa zame li pa rezonn dan mo zorey.
manman to mem kinn fer mwa dekouver ki mo été.
Mam to ine ed mwa batir mo lidantite.
To mem mo pli gran trezor e kot mo ete mo mazinn twa,
Mam, mam, mam zame mo fatige krie twa.
Mo kontan twa, to mem mo larenn,
To mo rekonfor kan mo dan lapenn.
Pena mo pou mo dire twa ki kantite mo kontan twa,
Pena parol pou mo exprim mo lamour pou twa.
Me les mo sey explike avek sa bann parol,
Les mo koze, les mo zwe mo rol.
Mo sir ki Bondie li existe parski a traver grander to leker,
Mo dekouver ki lao bizin enan enn bon kreater.
Mam kot to gagn lafors pou to konbat?
Gras a twa mo gagn kouraz depi ki mo mars katpat.
E tou bann zanfan ki pena mamam mo konpran zot solitid.
Parski san twa mam dan mo lavi tipou ena enn gran vid.
Mo sagrin ki zame mo pran letan pou exprim mo santiman,
E ziska ki mo gagn kouraz pou fer li mo dir twa mersi maman.
+Jean Rex Casimir
7 septam 2011
No comments:
Post a Comment