Lapli tonbe

Enn zardin dan enn lakour

Lapli tonbe,

Seki sinmin pouse.

Later bourzonnin,

Pou nou gagn manze demin.

Delo planin,

Pou lavi zermin.

Delo likid presie,

Enn pwisans merveye.

Enn ti fey apre enn lot,

Zoli melodi, zoli not.

Enn ti moman later kouver,

Ek verdir zoli kouler.

Sa plis ki mazik,

Ek paret mistik.

Ti pie vinn gran plant,

Pou nouri nou vant.              

Lapli tonbe,

Later netwaye.

Enn vre dinamism,

Ki balie tou pesimism.

Dimounn kriye,

Bondie tande.

Delo large,

Nou tou nou ere.

Delo donn lavi,

Li ranpli ek lenerzi.

A kouman nou zwaye,

Kan gro lapli tonbe.

Mo frer mo ser touzour esklav

Mo frer, mo ser touzour esklav,

Esklav parki toultan krwar zot pa kapav.

Lasenn dan lamin lipie inn fini kase,

Aster se zot leker ki inn atase.

Granmatin kot laboutik labwason marnin,

Lavenir mo frer mo ser fini sap dan so lamin.

Lot kote laba misie-la pe nek konte,

Li pe anrisi li lor ledo ti maler.

Pli pri labwason monte, laswaf la ousi ogmante,

Pou zot korek zot bizin kas kase.

Lalkol sak zour kraz bokou menaz,

Zonm bat fanm, fanm bat zonm, maryaz zero plonbaz.

Bann fami ti laflanm inn koumans bate,

Mari ek fanm sakenn pas zot kote.

Ladan se zanfan ki pey lepo kase,

Nou fami, nou trezor enn par enn pe expire.

Dan sosiete dimounn prizonien zot prop lorgey,

Zot legoism inn plonz zot dan enn profon somey.

Gro rekin manz ti pwason, seki gran manipil seki tipti,

Parmi bann zonm lazwa lazing regnin e li pa zoli.

Tou nou rasinn pe pran dife,

Nou kiltir pe fonn anba soley kopie kole.

Ant bann zenerasion enan enn gro problenm transmision,

Progre ou regresion, sa enn gro gro kestion.

Bokou move mantalite pe detrir nou bann reper,

Dimounn viv ninport koman ek refiz viv bann vre valer.

Anou tourn ledo ek bann seki dir ki Rodrige pa kapav,

Liber zot bann frer bann ser ki touzour esklav.