Sa fer nef mwa depi ki linn aprann sa zoli nouvel,
Li ti kontan pou kone ki biento li nepli pou tousel.
Ti bien kontan ki aster la li pou kapav donn lavi,
E gran lazwa pou li ek so mari trouv zot fami grandi.
Li fer atansion sak moman pou tou pass bien diran so grosess,
Linn gagn lasans profit manman ek belmer zot gran sazess.
Tou inn pass bien, linn fer atansion sak ti detay,
Fode gete dan fami kouman ti enan enn gran travay.
Tinn fini kalkile se ti garson ou bien tifi ki nom pou done,
Larive sa zanfan la ti vreman rann tou so fami ere.
E enn zour samdi li li santi kinn ariv ler pou ti bonom vini,
E kan li pe al lopital sa ti enn gran lazwa pou li.
Kan dokter inn vinn get li li konpran lakousman difisil,
E plitar lasante madam vinn deplizanpli frazil.
Fer li konpran ki bizin swazir ant zot de,
Parski sinon so lavi pou an danze.
Larm koule dan so lizie e li fer apel so mari,
Li aksepte sakrifie limem pou sov zanfan-la so lavi.
Bonomla plore me swa so bonnfam desid pou respekte,
Madam konin ki si li desid sakrifie so zanfan touletan li pou regrete.
Manman donn so lavi pou so tibaba kapav sove,
So sakrifis kan zanfan la konin zame li pou blie.
Personn pa pou kapav konpran lamour sa manman la,
Pou so tipti sape, li donn so lavi dan sa moman la.
Manman ale e se enn zoli tifi ki nesans,
Papa sagrin me fam la inn aksepte donn zanfan la so sans.
Kan zanfan la grandi e rakont li kouraz so maman,
Larm koule, li kriye e li promet ki touzour li rest rekonesan.
Sak lanin zour so laniverser li amen enn bouke pou so manman,
So manman enn lekzanp e dan so leker liankor touzour vivan.
Linne gagn mem sourir ek avek tou dimounn li enan mem zenerozite,
E kan so fami get li se sa fam kouraz ki zot touzour trouve.
+Jean Rex Casimir
25 Septam 2011
No comments:
Post a Comment