Mo enan enn rev
Kot tou dimounn konin kete lavi.
Tou bann nasion pou fer ennsel,
Pou nepli viv bann relasion artifisiel.
Zanfan dan tou pei zot lavwa pou tande,
Zot pou nepli gagn maltrete e explwate.
Reisit dan ledikasion pou nepli rezerve pou sertin,
Sakenn pou gagn drwa swazir so prop destin.
Zanfan loksidan ek lorian pou vin kouman frer ek ser,
Personn pou nepli enan souvenir lor kete lager.
Mo lager pa pou mem ekziste dan diksioner,
Tou bann pep pou viv an frer.
Bann lizinn ki ranz zarm zot pou’nn fermin,
Dan zot plas pou konstrir bann moniman pou bann temwin.
Pou nepli enan okenn lekar ant ris ek pov,
Fraternite ek partaz pou regne, pa pou enan okenn fov.
La natir li poi respekte partou kote,
Polision li pou vinn enn zafer klase.
Olie koup bann zarb pou plant beton,
Bann fler pou pouse mem ziskan a kote peron.
Dan mo rev enn ti group dimounn pou nepli lerwa,
Se lepep ki pou enan pouvwar pou fer tan so lavwa.
Bann marxis, kominis, kapitalis ek diktater, tou pou met de kote,
Pou les limanite swiv so kour natirel ki lape.
Dan lamer kouman lor later,
Mem bann zanimo pou konn leboner.
Okenn zanimo pa pou konn lasoufrans,
Lavi pou tou kreatir li pou enan sans.
Leboner pa pou rezerve selon groser ou portmone,
Pou tou dimounn li pou enn priyorite.
Ant tou bann zom pou enan enn vre kominion,
Lamour li pou aksepte kouman vre relizion.
La faminn, maladi, soufrans partou pa pou aksepte,
Kot dignite imin menase pou enan aksion solidarite.
Enn gran file imaniter pou existe,
Afin ki partou lape renie.
Tou dimounn pou viv an pe avek zot mem,
Stress, tansion, malad leker pou nepli bann problem.
Laenn, lorgey, lazalouzi pa pou enan plas dan nou leker,
Polites, tolerans, konpreansion pou permet nou viv an frer.
Enan boukou pou dir ki mo enn idealis,
Mo aksepte mem ki sertin dir mo enn utopis.
Tan ki mo vivan lapriyer lape pou lor mo lalev,
E mo ere ki zordi mosi mo enan enn rev.
+Jean Rex Casimir
9 Septam 2011
No comments:
Post a Comment