LIBER MO PEP

 Enn ti labriz ti pe kares mo figir alors ki soley timidman ti pe al kouse 

Lor flan montagn mo ti pe asize, vey mo zanimo ek trankilman kontanple 

Dan mo ninnin bann fragrans ti melanze ek dousman dousman elev mo nanm

Mo leker ti ranple ek tou seki fer lavi bann zanfan, zenn, zonm avek madanm 

 

Lor sa montagn mo ti an koneksion avek tou listwār mo pep 

Sa nasion ki pa pli gran ni pli pwisan me ki Adonaï inn swazir 

Nou pa kapav dir ki nou meyer ki lezot nou zis pe avanse step by step

Nou inn lite, trimin ek personn pa kapav dir ki nou lavi enn lwazir 

 

Momem mo inn nesans dan treboul, mo inn rat enn tini perdi mo lavi 

Tousa parski faraon inn gagn per ek inn anvi kontrol ek diminien nou letni 

Konbien tibaba inosan, sa bouro-la inn touye akoz so laswaf pouvwār

Rachel pe gagn kriz, inkonsolab, li pe plore ziskan so larm inn fer enn gro lamār 

 

Ler mo pe mazinn tou sala, ala ki mo nek kal ek enn ros e asoupi

Avek tou seki pe travers mo lespri mo plannin dan sa ti akalmi 

Ala ki ziskan pli profon mo lekor enn lavwa nek rezonnin

Enn tranbleman sezi mwan an antie ek enn bote mo vizionnin

 

Ala ki anz Lesegner limem li inn aparet dan enn touf 

Dan mo leker, mo dir: “Ayo monwār zordi mem to fini!” 

Mo ti ankor enan plin proze, me ala ki tou anvole “Fouf!” 

San ki konnin sepandan, li ti enan enn lot plan ki pe vini

 

Mo nom ti sonnin dan so labous ek mo reponn “Ala mo la!” 

“Momem Bondie to grandimounn ek mo enan enn mission pou twa” 

Lamizer mo pep ki ti dan esklavaz defile devan mo lizie, avek lasoufrans mo sezi 

Dominasion pe kraz li, tou kalite kout fwet li pe gagnin lor lekor lor lespri

 

Mank konfians, violans, zalouzri, lorgey, gro poumon, lalkol, ladiksion, lavi dezord, mansonz 

Montagn-la tro imans Papa, mo pa apt, mo pa dign, siltople anvway enn lot

Mo rezinbe, mo reziste, trouv mwan tro sesi ek tro sela, anvi pas leponz lor sa sonz 

Me li persiste, dir ek redir “Tomem mo inn swazire, al liber mo pep”, enn zoli not.  

 

+Jean Rex Casimir Novanm 2023

ANKOR

 

Granmatin kan mo leve mo santi enn agreab parfin levolision

Zonm ek lanatir dan mo pei Rodrig pe viv an parfe larmoni 

Mo pran enn pognin may mo zet ek mo bann poul parter 

Apre direksion mo park pou mo al donn bann koson manze

 

Kot mo pase lor mo zil zordi bann dimounn souriyan 

Matant inn leve boner pran inpe legim amennin pou vwazinn 

Tonton enn pake pwason dan lamin pe fer lapartaz ek so kamarad 

Lor miray mo trouv de madam ki pe sanz kari avek zenerozite 

 

Anba pie enn bann zonm pe asize pe met lagam ek fer fars 

Dan enn ti kwin mo trouv enn ki pe konsol so frer ki pe soufer 

Pe dir li pa dekouraze, konbat pou li ek so fami e pans demin 

Tanto sa bann mem zonm pou zwenn kot sant pou zot renion 

 

Mo desann kot larivier mo trouv bann madam ki pe lave 

Enn de ti marmay ant de badinaz pe donn koudmin sarye delo

La pandan plizier erdtan sakenn pou vid so leker, debale mo ser 

Kan ale non selman linz pou inn prop me leker ousi pou inn libere 

 

Avek kouraz ek lapeti mo al inpe pli lwin ennde trwa fami pe travay later 

Zordi inn sanz enn zournin pou ki demin zot gagn ousi enn zoli koudmin 

Kan to get lor figir sa bann dimounn enn lazwa de viv mo zonm, extra Rodrige O 

Telman to kontan ki tosi to trap to pios ek to pous « Ramas to dadiou semez… »

 

Aprezan kan to enan enn travay to ferm lizie to les bann zouvriye debriye 

Kan to vini tomem to kontan ek to pa sagrin pou to pey to larzan 

Fini sa letan kot to ti bizin deryer travayer pou ki to santie avanse 

Sa lepok kot ti nek kas lagel ek apre lager larzan, erezman se letan pase 

 

Pou mo fini mo lazournin, mo dir les mo al fer enn letour areopor, rins lizie 

A mo gran letonnman inn ekrir Areopor Internasional Plaine Corail, gro avion nek glise ale 

Zoto sa ki apel sa zour-la mo ti kontan kontan, mo ti l`homme le plus heureux au monde 

Enn kout mo santi enn plim nek pik mwãn, enn lavwa kriye « Poet revey twa to pe reve ankor ! »

 

+ Jean Rex Casimir