Mwan zwazo tibrim, boner granmatin mo sante
Avan soley leve mo kriye ziskan mo lagorz kase
Leve leve leve mo ser, leve leve leve mo frer
Ekout mo lalwa ek to pou trouv leboner
Kan mo sante touzour enan ki agase
Atase dan zot dra kouman enn mile
Bann ki saz kouman tann mwa zot stand-up
Mo lamizin li touzour la pou back-up
O debi letan soley ti nesans ek mo melodi
Depi sa zoli zour ansanm nou pou nou sinfoni
Malere selwi ki so bann reyon pet lor lonbri
Selwi ki align li lor nou ritm li pou ere
Zenerasion apre zenerasion nou fidel a nou post
Avek nou zamin limanite inn konn enn lost
Domaz dan enan bann rezion kot mo persona non grata
Dan sa bann kontre se somey ki dirize kouman lerwa
Mo rapel premien fwa kot mo ti sante dan bas-kour
Mo ti donn tou seki enan dan mwan avek lamour
Malgre mo ti ankor mank konfians mo’nn pous tou
Depi sa moman-la mo touzour sante avek gou
Zordi mo ekzers sa servis lao lor mo tronn
Enn sinp brans mo biro ek lor mo latet mo kouronn
Mo paret inofansif se seki fer fezer gagn kout zergo
Pa krwar parski mo kostim miltikolor mo enn zero
Defo mo kourer, me kot met mwan, mo donn lemeyer de momem
Mo’nn swazir pou get bon kote lavi koumann ver ris enn poem
Li mo sertitid ki mo lavi pa pou fini dan malpropte labrim
Vinn marye to lavwa avek pou mwan, anou sante depi tibrim
Image: Jairo Alzate
No comments:
Post a Comment