Inn ler pou rekonsiliasion,
Depas lepase e demann pardon.
Li vre ki nou inn fer nou frer ser ditor,
Par nou aksion nou inn tap inpe for.
Lalang penan lezo, bann parol blesan nou inn prononse,
San reflesi bann dialog rankinie inn defile.
Li bien malere ki inn enan bann atak personel,
Parfwa dan lektas enan ti pre pou pous lezel.
Enan ki tinn blie zot responsibilite familial,
Toulezour ti enan fet, fiesta ek festival.
Mem bann ti zanfan pa ti eparnie, zotsi inn met lafaya,
Zot inn skand tou kalite slogan, fode ou trouv sa fraka-la.
Zour bann bwat koze fer tann zot lavwa lafiev monte,
Lazwa eklate dimounn galoupe dan tou kote.
Bann seki viktorye larm koule dan lizie ek gagn felisitasion,
Avek sazes zot fer konpran ki inn ler pou rekonsiliasion.
No comments:
Post a Comment